Ta spera cu incinerator lo cuminsa funciona pa october

Diahuebs atardi durante un conferencia di prensa, minister Otmar Oduber (POR) a informa tocante e incinerator cu lo cuminsa opera den dos siman, declarando cu e proceso lo ta miho pa medio ambiente.

E intencion di e encuentro cu prensa tabata pa mira e mashin y henter e proceso pa cu e sushi. Oduber a splica cu e area lo ta mas agradabel pa esunnan cu tin cu traha cune. Segun Oduber, e mashin tambe ta cumpli cu tur norma internacional pa locual ta trata e medio ambiente.

Cu diferente tarea tabata procesa e sushi antes, unda tambe tabata haci uzo di open air burner cu tabata pa kima y yena palet pa purba seca. Sinembargo despues di tir’e den landfill tabata ocasiona cu no tabata kima 100% y tabata crea disgusto pa persona cu ta biba den area Parkietenbos y rond Aruba.

E sistema actual ta diferente, caminda e ta traha automaticamente, saca y hinca. Henter un sistema automatico, den cual e sushi ta bay paden di e mashin, e ta wordo seca den e prome parti anto ora e seca 100%, e ta drenta den incinerator mes unda e ta kim’e, cu na final ta sak’e como as cu no ta haci daño.

Oduber ta splica cu esaki ta un sistema mas completo cu esun anterior. “Na momento cu nos a drenta den gobierno, a pone condicion cu nos lo pone e parti di control pa gas cu por sali den medio ambiente. Un compania local cu a cumpli y tabatin e mashin disponibel.”

E ta bisa cu ta spaar placa di gasto; cu antes di DOW tabata gasta 1.3 miyon florin pa aña, cual awo e lo baha pa 700mil pa 800mil florin. “Asina ta elimina e forma anticua di atende cu sludge, y ademas ta reduci gasto di operacion, cu consecuencia cu por uza fondo pa otro meta.”

Tambe a uni cu Serlimar, cu tabata recoge bestia morto y bestia di laboratorio, y tabata deshaci di nan mediante kimamento. Awo a adapta pa e mashin pa por haci uzo di e proceso pa kima tur restonan di bestia. Locual ta trata e desperdicio medicinal toxico, esaki tambe ta inclui den e sistema di maneho di desperdicio. Conforme na regla internacional, un incinerator ta mas responsabel y higienico cu e situacion cu tabatin riba dump, particularmente pa salud humano. E plan ta pa elimina e resto di trabou y cera Parkietenbos.

“E sistema nobo lo ta pa hende por traha cu un sistema computarisa, mas moderno, caminda ta saca un producto amical pa nos medio ambiente. Ta spera cu den 2 siman e resto di ekipo keda instala y di eynan pa otro luna e ta completo den operacion”, Oduber a finalisa bisando.