Dialuna ultimo, minister di Husticia, Andin Bikker a ofrece algun declaracionnan pa medionan local pa loke ta trata e incidentenan cu a sucede na Guarda Nos Costa cu e personanan cu ta deteni na e luga ey.
Manera comunidad a conoce, e situacion na Guarda Nos Costa a bira un poco tenso debi cu e frontera cu Venezuela ta cera. Bikker a bisa cu nan a haci varios intento pa por yega na un acuerdo via diplomacia cu e Gobierno di Venezuela, pa asina Aruba por transporta algun di e personanan aki via repatriacion pa Venezuela.
Sinembargo, el a menciona cu te ainda no a logra esey y ta spera cu e siman aki por yega na un acuerdo diplomatico. Entre tanto el a comenta cu nan ta wak con e maneho ta na Hulanda, pa motibo cu nan ta enfrentando cierto casonan similar pa loke nan a introduci loke nan ta yama openbare orde toets beleid.
El a señala cu esaki ta bisa cu por retene personanan cu ta un peliger pa orden publico, pero tambe si nan ta evadi e parti di deportacion. El a manifesta por ehempel, personanan cu a sali for di KIA cu ta considera un menasa pa orden publico y nan ta keda deteni, personanan cu a comete un ofensa contra openbare order como peleanan cu no ta suficiente pa detene nan bao regimen penal.
Tocante otro personanan cu ya caba tin hopi luna deteni, Bikker a expresa cu ya nan a cuminsa revisa pa wak si nan por tin un garante, cu mester ta un persona local di nacionalidad Hulandes, cu tin cu demostra cu por ta garante di e persona aki pa ora e frontera habri back nan lo meld pa por wordo deporta. “Esey ta bayendo bon y varios persona a haya nan garante.”
Di esaki el a specifica cu ademas tin un ekipo di mediacion cu ta consisti di miembronan di KPA, Ministerio di Husticia y di Warda Nos Costa mes cu ta reuni diariamente cu e representantenan di e personanan cu ta eyden y asina nan ta wak nan preocupacionnan, pa percura alivia e situacion te ora cu nan por yega na e resultado final, cu e frontera lo wordo habri cu intermediacion diplomatico pa nan por bay back nan pais.
