Gerencia di ANSA N.V. a tuma nota cu diadomingo 4 october 2015 Minister encarga cu Transporte, Sr. Otmar Oduber, a yega na un acuerdo cu controladonan di trafico aereo di ANSA pa loke ta trata uzo di idioma den comunicacion entre personal di toren y pilotonan cu ta haci uzo di e espacio aereo di Aruba.
Despues cu ultimo dianan tabatin hopi discusion riba e topico aki, Minister Oduber den consulta estrecho cu ANSA y Departamento di Aviacion Civil a yega na un acuerdo cu e controladonan di trafico aereo. Un acuerdo cu tur esunnan envolvi por biba cun’e.
Nos ta confia cu e acuerdo aki lo trece paz y trankilidad den ANSA y principalmente contribui na un espacio aereo mas “safe”, cu na final di dia ta e meta comun di tur partido envolvi.
Den e acuerdo aki a palabra lo siguiente:
1. Entrante di inmediato lo revoca e NOTAM A0359/15. Den e NOTAM aki (cu ta un extension di un NOTAM publica cuminsamento di juni 2015) a wordo anuncia cu entrante 1 september 2015 ta uza e idioma Ingles den e comunicacion entre personal di toren y pilotonan y ta uza Spaño solamente den casonan excepcional ora esaki ta necesario pa evita confusion.
2. Di inmediato mediante NOTAMS nobo lo anuncia cu entrante 4 october 2015 te 1 juni 2016 lo uza Ingles como idioma primario y Spaño como idioma secundario.
3. E periodo menciona den punto nr.2 ta un fase transitorio. Esaki ta nifica cu entrante 1 juni 2016 lo cuminsa implementa e maneho di idioma manera menciona den e NOTAM A0359/15.E motibo pakico a scoge e fecha di 1 juni 2016 ta cu segun planificacio y palabracion entre ANSA y DC-ANSP (e ANSA di Corsou) entrante e fecha aki lo cuminsa implementa e proyecto di Radar Data Sharing, cu ta encera cu den toren di Aruba nos lo ricibi riba nos monitornan e señalnan di radar di DC-ANSP.
4. Den e periodo entrante 4 di october 2015 te cu 31 di december 2015, ANSA lo haci su maximo esfuerso pa tur controlado aereo di ANSA por cumpli cu e exigencia di tin nivel 4 di competencia den e idioma Spaño manera rekeri door di reglanan di ICAO. Motibo di esaki ta cu segun reglanan di ICAO, Aruba por duna servicio di trafico aereo den dos idioma, pero pa por haci esaki mester cumpli cu e nivel 4 pa ambos idioma, esta tanto Ingles como Spaño. Segun acuerdo, si no logra esaki pa 31 di december 2015, entrante 1 di januari 2016 lo cuminsa implementa e maneho di idioma menciona den NOTAM A0359/15.
Por ultimo ANSA ta haci uzo di e oportunidad aki pa gradici tur partido envolvi cu a mustra boluntad pa yega na un solucion satisfactorio pa un y tur.
