Den conferencia di prensa di diabierna pasa nos reportera Sra. Morillo a haci e siguiente pregunta na nos Minister President Sra. Evelyn Wever-Croes: “Minister president ta costa nos anualmente Afl. 180.000 plus Afl. 200.000 na reservacion pa pension. E 380.000 florin aki ta e base di e Wever-Croes norm?” E contesta di nos Ministro Presidente cu a sigui tabata sorprendente “at best” y engañoso “at worst”: “Mi tin cu bisa Sra. Morillo cu e informacion aki no ta conoci cerca mi. Locual ta base pa e Wever-Croes norm ta e salario di Minister President plus locual bo ta haya na beneficio. Tur minister tin e mesun salario aki na Aruba, e ta poni den ley. Y tur minister ta haya esaki. E unico beneficio cu bo ta haya acerca ta e vakantieuitkering cu awor nos a entrega completamente. E cifranan aki ta poni den ley, kiermen nan ta disponible pa tur hende.”

Sorprendente pasobra Minister President mester ta conoci cu e Landsverordening voorzieningen gewezen politieke ambtsdragers en hun nabestaanden. Su pension como ministro ta basa riba e ley aki. Esaki ta e ley cu na su introduccion na 2010 a trece kiebro den MEP. Sra Wever-Croes na 2010, como parlamentario di MEP e tempo aya a bay contra e “instruccion di voto” di ex- promer ministro Sr. Nelson Oduber y a keda sin vota. Dos di su otro coleganan (Sra. Marisol Lopez-Tromp y Sra. Mervin Wyat- Ras) cu tambe a ignora e “steminstructie” y si a vota na fabor di e ley, mester a paga esaki cu royement for di partido. Pues e ta un ley cu esnan cu no ta sigui politica di cerca mes por corda, laga pa esnan cu ta den dje tur dia.

Engañoso pasobra ta parce cu Minister President ‘cueste lo que cueste’ kier tene esaki scondi pa pueblo. Pero bo no por tapa solo cu un dede. A base di e ley aki un minister ta acumula un pension di 70% di su salario di fl. 15.010 pa luna, den apenas 8 aña. Pues un pension di Afl. 10.507 pa luna. Manera nos a yega di bisa caba, ministernan ta “bouw op” 8.75% di nan pensioen pa aña, siendo pa hende comun esaki ta mara na un maximo di 1.75%-2% pa aña. Dos hende hopi cerca di nos Minister President, Sr. Arie Swaen y Sra. Hellen van der Wal tabata presidente y secretario permanente di nos Conseho Consultivo (Raad van Advies) na 2010. Si Minister President por a lubida, nan dos sigur por refresca Minister President su memoria riba e conseho cu Raad van Advies a duna na 2010 riba e ley ariba menciona. Nos ta cita parti di e conseho di 1 december 2010:

“Hoewel met de onderhavige voorstellen ‘een substantiele versobering” wordt beoogd, wordt verzuimd deze inzichtelijk te maken. Dit dient conform artikel 6, Comptabiliteitsverordening 1989 alsnog te geschieden. Ook het feit dat de onderhavige voorstellen volgens ondergetekenden een ‘opoffering’ zou inhouden, rechtvaardigt een inzichtelijk maken van de omvang hiervan.”

Nos ta interpreta esaki como nada otro cu haci e “entrega” cu e ministernan y parlamentarionan a haci, ‘inzichtelijk’ o transparente y di con e “entrega” tabata hustifica.

Locual Raad van Advies a pidi gobierno di AVP e tempo ey haci, pero cu gobierno a keda sin haci, nos di Bon dia Aruba si a haci. Nos a laga haci un calculacion di e costo pa aña di un reserva di pension pa un persona cu a nace riba 5 di december 1967, cu un salario pa luna di fl. 15.010 y cu ta “bouw op” un pensioen di 70% di su middelloon den 8 aña. E resultado no a sorprende nos. E costo di pension aki ta Afl. 200.000 pa aña. E calculacion aki no ta ‘rocket science’. Cualkier fiscalista o accountant lo por a haci un calculacion asina riba un coaster durante “borrel” y duna bo un “ball park figure”, di e costo anual di e pension aki. Ultimo biaha cu nos a check, Minister President ta un fiscalista di profesion, pues nos no por imagina nos mes cu e no sa cuanto placa su pensioen ta costa pueblo. Locual ta parce nos ta, cu e no kier pa pueblo sa cuanto su pensioen ta costa. P’esey nos Minister President kier pretende di no conoce e cifra di Afl. 200.000 cu Sra. Morillo a menciona. Esaki ta mustra un falta total di transparencia y sinceridad di parti di nos Minister President. Ta parce cu Minister President despues di 10 aña ainda no kier cumpli cu nos Comptabliteitsverordening manera Raad van Advies a pidi na 2010. E ultimo aki nos no por imagina cu e ta carga aprobacion di Sra. van der Wal como miembro di CAFT.

E insistencia di Minister President di no kier inclui e costo di su pensioen den e base di e Wever-Croes norm ta parce manera cu Minister President kier tene hancho pa su mes y demas “ambtsdragers” y super smal pa tur otro hende. Of ta simplemente falta di coraje pa enfrenta su colega ministernan y su parlamentarionan. En todo caso cu e actitud aki e Prome Minister no ta parce di tin pueblo central.

No cabe duda cu door di no inclui e “loonbestanddeel” mas grandi di Minister President den e Wever-Croes norm, esaki lo perhudica e directornan di e empresanan estatal grandemente. E ‘aanspraak op pensioen’ cu Minister President ta acumula tur aña ta 110% di su salario anual. Ta un diferencia hopi grandi si bo ta sali di un norma di Afl 214.000 of un di Afl 414.000. Pasobra nos ta asumi cu e “pensioenaanspraak” di e directornan si ta forma parti di nan salario y beneficio secundario den e Wever-Croes norm.

E speransa cu nos por tabatin den e gobierno aki, cu nan si ta serio ora nan a bisa cu nan lo kier traha riba integridad, a resulta den otro speransa falso. Manera Peggy Noonan, speech writer pa President Ronald Reagan a yega di bisa:

“The president’s character is everything. A president does not have to be brilliant; he does not have to be clever; you can hire clever….But you can’t buy courage and decency, you can’t rent a strong moral sense. A president must bring those things with him.”

Esaki tambe ta conta pa un Minister President. No cabe duda cu nos actual Minister President ta un di esunnan mas sabi cu a yega di asumi e puesto aki na Aruba….