Ta sigui recomenda pa comunidad bay vacuna y situacion na Aruba por bira miho

Covid-19 y su variantenan ta sigui representa un preocupacion pa habitantenan di Aruba ya cu segun Departamento di Salud Publico y su specialistanan, e ultimo variante esun denomina ‘Delta’ cu a origina na India ta esun cu ta asotando mas e comunidad y henter mundo.

Manera a wordo informa y por a comproba via e aumento di casonan positivo, esaki ta e variante mas contagioso y segun nan a premira si comunidad no ta tuma e vacuna, ni ta usa e proteccion manera mester ta, por trece como consecuencia cu edad di hende afecta ta baha, manera ta conoci cu hende hopi hoben y muchanan cu ta hayando Covid-19.

Asina a expresa doctor Wilmer Salazar di Departamento di Salud Publico di Aruba na unda tambe a trece dilanti cu e situacion na Aruba ta birando mas grandi “si esnan cu tin e solucion, ta nos mes, please bo mester haya bo vacuna y sigui proteha” el a sigura.

Tambe, a keda comproba cu esunnan cu no ta vacuna y cu ta haya infeccion pa Covid-19 tin e peliger inminente di por cambia y muta e virus cu por ta mas peligroso, esey ta e problema y no esunnan cu ta vacuna segun Salazar a indica pa motibo cu personanan cu ta haya e vacuna tin bentaha di cu den algun caso no ta haya infeccion y si lo haya mes e sintomanan ta hopi leve.

“E no ta pone den peliger su bida ni di otronan, pasobra ora bo tin e vacuna e virus ey ta limita su contagio, e ta kibra e contagio di e virus aki”, Salazar a expresa.

Segun Salazar esey ta e punto mas importante, pa motibo cu mayoria di hende cu a wordo contagia cu tin sintomanan y cu ta wordo hospitalisa den unidad di cuido intensivo (ICU) ta hende cu no ta vacuna, un porcentahe hopi grandi segun resumen cu e departamento aki ta mustra tur dia cu nan cifranan.

“Lamentablemente nan no a haya e vacuna y awor nos ta pasando e situacion aki” el a bisa.

Tambe, Salazar a trece dilanti su experiencia pa loke ta trata vacunacion na unda el a señala cu aunke henter su famia a vacuna, su casa a hay’e Covid-19 pero e no a presenta hopi sintoma, dolor di cabes y su nanishi a core, ademas el a sigura cu su persona mes no a haya e virus.

Basa den su experiencia familiar, Salazar a enfatisa cu e vacuna si ta protege. Ademas Departamento di Salud Publico hunto cu Crisis Team tin un organisacion cu a cuminsa for di luna di maart tocante loke nan ta yama ‘mobil team’ cu tin e funcion di duna charla na empresanan di sector turistico y entro otro, pa asina tur empleado kita tur duda cu nan por tin tocante Covid-19 y ademas di esey nan ta haya e oportunidad di aplica su vacuna.

Tin companianan caba cu ta hayando su vacuna, pero di otro banda, tin un otro grupo cu ta dificil y nenga pa haya e vacuna aunke nan ta informa cu e vacuna no ta produci efectonan secundario, el a enfatisa cu si tin trahadonan cu ta den grupo di risico cu nan por tuma contacto cu Departamento di Salud Publico pa nan haya e charla y na mesun biaha e vacuna.

Di otro banda, pa loke ta trata e infeccion cu ta tumando luga den comunidad na e momentonan aki, epidemiologo Gareth Tromp a splica cu nan ta hayando diferente factornan cu loke tin di haber cu aumento di casonan, no solamente esey ta sosodiendo na Aruba sino na henter mundo tambe.

Loke nan ta kere cu a pasa cu a causa e aumento di infeccion ta cu personanan cu a wordo contagia tin un historia di biahe y esey ta nifica cu nan a importa e casonan y tambe tin personanan local cu tambe a wordo infecta cu no tin historia di biahe.

Di esaki, Tromp a manifesta cu na luna di juli casonan local y personanan cu a biaha a cuminsa subi di mesun forma igualmente cu na Merca y na Hulanda, loke ta nifica cu e gran mayoria di casonan cu a wordo importa a bin for di Hulanda y for di Merca.

Despues cu variante Delta a yega cu esunnan cu a biaha, di loke ta trata e positivite rate cu dia pa dia ta subi den personanan local, Tromp a señala cu esey ta e indicado cu nan ta usa pa wak kico ta pasando cu e infeccion y cu ta bisa cuanto caso nan ta faya y cuanto nan ta detecta.

“Cu un positivity rate halto ta nifica cu nos ta fayando mas caso”, el a bisa.

Den ultimo simannan di juni, nan a mira un introduccion di e variante Delta na Aruba y esey a bay igual cu un aumento di incidencia, Tromp a menciona cu esaki ta pa motibo cu variante Delta ta “increiblemente mas contagioso y ta wordo pensa na e momentonan aki cu e ta alrededor di 50% mas contagioso cu variante Alfa”, Tromp a sigura.

E indicacion di edad entre esunnan cu ta test y ta sali positive, Tromp a indica cu esey a cuminsa subi den esunnan cu tin entre 18 pa 45 aña y muchanan bou 18 aña, na unda el a sigura cu ora e ola nobo aki a cuminsa nan ta esunnan cu tabatin e rate mas halto den infeccion y awo esunnan cu edad mas halto riba 45 aña ta mas abou.

Pa finalisa, el a indica cu esunnan vacuna tambe ta test positivo y ta wordo interna den hospital pero si ta mira e proporcion di kico ta sosodiendo ta duna como conclusion cu di berdad e persona si por haya Covid-19 aunke ta vacuna, pero e chens di hayel’e mas fuerte ta hopi chikito y den esey mester enfoca.

A pesar cu den grupo adulto esunnan vacuna ta representa 30% so di e poblacion, nan ta representa alrededor di 84 % di e casonan cu ta rekeri cuido medico na hospital, desde juni nan ta 93% di e casonan cu ta caba na ICU y 100% di e casonan cu ta muri di Covid-19 na Aruba.