Ta sigui grita autonomia… Cu bo no por come…?

Nos ta mas di cinco luna den e crisis mas grave cu a yega di dal mundo, y nos pais en particular. Desde e promer momento tabata masha cla pa tur hende cu nos ta e pais mas golpea pa e crisis aki, pasobra nos ta e pais mas dependiente di turismo.

No a tarda hopi pa ayudo bin di Hulanda, pero cu condicion. Esey no ta mas cu logico, pasobra duna e isla aki un saco di placa sin control lo ta igual na pone gato cuida pisca, y esey e Hulandesnan a comprende bon desde e promer momento.

Esaki a lanta rabia di esnan mas preocupa no pa perde autonomia, sino mas bien loke nan ta perde ora bin mas supervision riba loke nan ta haci. Nan desde e promer momento a cuminza un cruzada contra e ayudo cu nos tur sa cu nos no por falta. Y si tabatin duda ainda con cos ta para na e momento aki, nos por a mira un splicacion masha cla di parti di un di e poco funcionarionan publico cu aparentemente por papia sin represaya, esta e director di departamento di Finanzas. Asina mes, nos tin un gran parti di parlamento ta den un yoramento constante tocante e supuesto crueldad di e Hulandesnan, cu ta yuda nos pero nos lo mester morde e man cu ta cria nos, pasobra finalmente, si nos mester kere e tiponan aki, e Hulandesnan, pa no usa e otro palabra cu nos ta tende a menudo, ta mustra loke supuestamente nan ta desde varios siglo: un set di sinberguensa cu a bin aki pa chupa sanger di e pueblo aki, y cu ta dispuesto di recolonisa nos… Ta bon cu mayoria di hende, segun nos opinion, no ta kere e payasadanan aki y ta consciente cu na e momento aki nos no por haci nada sin e ayudo aki.

Nos ta puntra nos mes si e parlamentarionan aki, den nan ‘job’ comodo unda nan no ni mester aparece na trabao, por ta na altura kico ta pasando na e momento aki den pueblo. Hamas Aruba a yega di pasa den un situacion asina; e ciere di Lago den añanan 80 di siglo pasa ta mustra manera un fiesta di mucha compara cu loke ta pasando actualmente. Esnan cu tin trabao ainda den sector priva, pa un gran parti ta depende di e subsidio cu Hulanda ta pone riba mesa. Na momento cu e subsidio aki desaparece, un gran parti di e empleadonan subsidia aki ta bay caya tambe, pasobra no tin ‘business’ na e momento aki pa sostene e payroll aki, y cu e crisis di Covid-19 bayendo for di man, mucho menos. Gobierno ta defende cu alma y cuerpo e mas di 8.000 salarionan cu nan ta paga tur luna, pero sin subsidio gran parti di sector priva ta keda condena na limosna pasobra no tin nada otro. Esey ta loke nos kier?

Awor, claro cu nos tambe ta tende e discurso di nos Promer Ministro, cu no ta laga ningun ocasion bay perdi pa enfatisa cu “mi no ta laga e isla aki kibra”. Cu esey e ta bisando, cu finalmente lo mester acepta e oferta Hulandes. Hasta e ta mustra cu ta algo temporal, y cu nos lo sali fortifica di e proceso aki. Sin embargo, ta parce cu e ta convence hopi hende menos e gritonan den parlamento cu ta sigui afanosamente demonisando Hulanda pasobra supuestamente nan kier bin aki pa ‘take over’. Nos lo bisa: y ni cu esey ta asina, boso ta haya esey straño? Acaso despues cu Knops a bisa na un manera provocativo cu e islanan aki no por maneha nan autonomia, loke ta sucediendo den e lunanan nos tras, no ta proba exactamente loke e ta bisa? No mester lubida cu nan a convence nos politiconan sabio di e subsidio di salario, pasobra si ta pa nan, ni esey nos lo a haya.

Ademas, tur loke nan ta propone pa haci, no ta e cosnan cu cualkier persona cu kier biba den un pais ordena lo ta desea, pero durante mas di trinta aña a mira esaki bira un soño cada vez mas remoto? Cu un total di tres ministro candidato pa varios aña di KIA, y ningun señal cu e practicanan aki a caba, si nos mester kere e ministro di Infrastructura, ta ken tin e autoridad moral pa bisa e Hulandesnan cu nan no tin nada di bin haci aki? Nos no por comprende cu tin politico cu ta kere cu nan por gaña nos ainda cu nan ta bay remedia tur e cosnan aki cu ta bay robez pa varios decada caba, mientras tur dia nos por mira señal cu tur cos ta ‘business as usual’? Nan ta bay drecha e aparato gubernamental, nan ta bay reduci payroll cu par di mil hende, nan ta bay percura pa servicio drechi pa e ciudadano? No, unico cos cu nos a haya ta un roadshow di ‘innovacion’ sin un palabra dedica na e problemanan real cu e ciudadano tin cu gobernacion. Manera a ser bisa na nos politiconan: “boso no ta haci boso trabao, otro ta bin hacie pa boso.” Y un cos mas: nos no ta Arubiano so, nos ta ciudadano Hulandes tambe.