ORANJESTAD — Maske frontera entre Aruba y Venezuela ta cera, deportacion ta keda na vigor pa Venezolanonan. Esaki ta contrario na e informacion (inoficial) cu prome minister a duna siman pasa.

Asina minister di husticia, Andin Bikker (POR), a anuncia ayera durante conferencia di prensa semanal. “Esunnan cu a haci un apelacion riba asilo ta un grupo separa, pero esunnan cu simplemente nos ta haya ta trahando sin permiso y no tin caso andando, of cualkier otro cos, eseynan ta pasa pa deportacion.”

Pues segun e minister, maske tin un situacion di ceramento di frontera entre Aruba y e pais Bolivariano, no ta forma problema pa deportacion, pasobra vuelonan ta sigui. Sinembargo no tin suficiente espacio pa tene esunnan den proceso di deportacion den detencion, mirando cu e centronan di detencion pa deportacion ta yen. Esaki mientras e situacion na Venezuela cada dia ta cay bou mas presion di parti di e presidente interino su intentonan pa laga ayudo humanitario drenta Venezuela.

Pa e aspecto di deportacion, esaki por ta algo hopi delicado, mirando e noticia cu nos a presenta par di siman atras, unda un persona residencia na Aruba su persona conoci haya noticia cu el a yega bek Venezuela despues di a pasa procedura di deportacion, y aya nan a asesin’e. Gobierno di Aruba tin un deber bou tratado di refugiado pa no deporta personanan cu ta refugiado (non-refoulement), of cu ta wardando un procedura di asilo.

Abuso di poder di migracion tin atencion, segun minister
Den mesun rosea, Bon Dia a haci un pregunta relaciona cu abuso di poder di parti di autoridadnan di migracion cu a tuma luga den fin di siman, unda autoridadnan a presenta na Gelatissimo pa check documento di personanan trahando na e establecimento.

Personanan cu a mira esaki a manda un remitido den nos corant, unda a comenta con a crea un desorden mientras turista tabata wak. E personanan a comenta cu a haci un desorden innecesariamente, mientras cu por a simplemente pidi e managernan pa documentacion di trahado.

Minister a reacciona bisando cu su ministerio tin atencion pa e tipo di casonan aki, maske su persona no tin conocemento di e caso aki specifico. “Mi lo atende cune cu e management team. Pero loke nos a descubri ta cu tin hopi falta di curso y update di cursonan pa varios departamento di orden. Tur caso cu bin na mi oido lo mi hiba na management team, y mi ta percura pa check e otro banda di medaya tambe.”