Segun mandatario encarga cu salud, e investigacion riba e metemento den PAP test pa laboratorio di Hospital (LABHOH) ta andando. Mientrastanto ta aparenta cu e laboratorio ta sigui haci PAP test na Aruba mes pero cobrando e suma cual ta cobra pa e test bay Hulanda.
Durante un conferencia di prensa dialuna mainta, Minister di Salubridad, Turismo y Deporte Dangui Oduber (MEP) a duna un update tocante e situacion cu tin den laboratorio y investigacion cu ta andando.
Manera ta conoci cu siman atras den corant ‘Amigoe’ Nico van der Zee a publica den su columna un relato di un posibel caso di fraude. Na e mesun momento e mandatario ta splica, cu a dirigi varios carta na Hunta di Supervision na Hospital caminda a instrui pa haci un ‘investigacion inmediato’.
Esey ta tumando luga basa riba resultado di un investigacion di echonan (feitenonderzoek) cu tabata necesario pa cuminsa un investigacion forensico. E investigacion ta tumando luga y tin dos empleado cu actualmente tin prohibicion pa entrada. “Nan tin schorsing y e mensahe ta bay pa tur empleado.”
Oduber a expresa cu no por ta cu trahado ta haci negoshi cu salud di hende y si resulta di tin prueba cu locual ta pasando, e minister a bisa ‘esun responsabel sigur tin cu paga esaki’. El a bisa cu dentro di poco tempo e investigacion forensico lo yega su final y lo comparti cu prensa y comunidad e resultado.
Actualmente haciendo test na Aruba pero cobrando manera si ta haci na Hulanda
A puntra e mandatario si e PAP test actualmente ta tumando luga na Aruba of na Hulanda. E minister a contesta cu den e caso aki e informacion no ta confirma ainda pa motibo cu tin investigacion andando sinembargo cu test ta tumando luga na Aruba mes, pero e cobransa ta manera si e test ta tuma luga na Hulanda pero investigacion lo mester determina si esey ta e caso.
