E ley di medio ambiente cu hopi na Aruba ta anticipa, ainda no a keda cla aunke desde 2008 hasta gobierno a busca un hurista na Hulanda pa traha riba esaki. Pero di otro banda un comision for di comienso di añanan 80 ya a conclui  cu tin suficiente leynan ambiental na Aruba caba.

Minister Mike de Meza di Medio Ambiente ta bisa Ret Karibense, cu pa motibo di falta di huristanan experto, tin e tardansa den e proceso di ley. Esaki no ta prome biaha cu el a bisa esaki y den e ultimo 4 aña ya el a priminti cu e ley ta keda cla. Dos aña pasa por ehempel e tambe a bisa cu dentro di un par di luna e ley lo bay parlamento. Pero te awor e ley no a yega. A puntra e minister si e ley lo bin prome cu eleccion na september pero e minister su contesta no ta mustra cu e por garantisa esaki.

Segun e minister tin un ley di medio ambiente pa 40 aña caba pero cu mester adaptacionnan. Y e adaptacionnan aki a tarda entre otro pa motibo awor di falta di hurista specialisa. Na 2011 su colega Benny Sevinger, cu e tempo ey tabata minister di Medio Ambiente, a organisa un reunion cu publico y partidonan di interes pa delibera over di e ley conceptual nobo. Sinembargo e concepto aki a resulta ta asina complica cu a dicidi cu mester adapta esaki pa asina por ehecuta esaki.

Esaki a trece e tardansa, pero na 2017 ainda despues di dos gabinete di Mike Eman no a logra cu ley ambiental aki.

Autoridadnan no ta actua
E necesidad pa un miho legislacion ambiental a sali na cla e siman aki atrobe cu e candela na e dump ilegal di Tamarijn. Segun criticonan autoridadnan mas tanto ta sconde tras di e excuus cu ta falta un ley di medio ambiente na Aruba pa actua contra casonan asina. Sinembargo mas cu 30 aña pasa un comision di gobierno ya a conclui cu Aruba tin suficiente leynan y reglanan pa actua pero tin mal cumplimento cu nan. Polis tampoco no ta alcansa di actua a base di e reglanan ambiental poni den Algemene Politieverordening.

Esaki tambe otro casonan ta mustra. Na Aruba tin basta buraco grandi unda a coba santo y despues yena cu tur sorto di sushi sin cu tin control. Banda di esaki tin e caso di dump di asbest riba e tereno di refineria cu ta ilegal y unda autoridadnan no ta actua. Y tambe no ta actua contra e dump mas grandi na Aruba, esta Parkietenbos, cu tampoco a uno legal.

Maneho contra dump
Manera Bon Dia Aruba a publica tin un maneho contra dumpnan ilegal bou Ministerio Publico for di 2011. Pero te awor nan no ta actua riba esaki. Nos a puntra varios biaha di haya un entrevista cu e procureur-generaal, e hefe mas grandi di OM, riba e topico aki. Pero te ainda no a logra. E unico comentario cu nos a ricibi te awor ta for di e vocero:

“E parti di medio ambiente, procureur generaal Alexander van Dam kier cu ne aworaki.  E problema t’ey, esey nos sa. Ley ta masha limita den e area aki y cu esey tambe nos rol. Nos ta trata di reacciona mas adecua posibel ora ciudadano consciente hala nos atencion.”

Siman pasa minister di Husticia Arthur Dowers a indica cu lo actua contra e dump di Tamarijn. Kico exacto lo bay haci no ta conoci ainda. Tambe Bon Dia Aruba kier sa si e minister lo bay actua contra e otro dumpnan ilegal cu ta existi na Aruba.