Organisacion di cabesantenan di scolnan basico:

Den cuadro cu e tema di ausencia di muchanan na scol y con e maneho ta pa anda cu esaki, y presidente di Organisacion di Cabesantenan di Enseñansa Basico (OCEB) y tambe cabesante di Colegio Ora Ubao Ivan Croes ta bisa cu nan lo purba di mantene nan mes na e protocol escolar.

E ta splica Bon Dia Aruba un poco riba e protocol aki. Cual parti di esaki nan a discuti recientemente hunto cu Bureau Leerplicht y ministerio di Enseñansa pa desaroyonan cu mester bini pronto.

Despues di e caso di Roshandroh y Eugene aña pasa, minister encarga cu enseñansa a haya ta hopi importante pa scolnan haya informacion for di entre otro Bureau Leerplicht. E organisacion OCEB – tur cabesante di enseñansa basico – ta reuni un bes pa luna. Den esaki a hinca den planificacion pa haya informacion for di Bureau Leerplicht cuminsamento di februari cual segun sr. Croes e dia tabata sigur hopi informativo. “Nos a aclaria algun punto cu tabata colga.”

Den Bon Dia su editorial di algun dia pasa, nos a subraya cu prioridad mester ta cu tur scol cu ta haya subsidio di gobierno, mester duna tur informacion tocante tur alumno cu nan tin, y no solamente na cuminsamento di aña escolar. Esaki ta algo cu mester sosode cada tres luna manera obliga. Nos a puntra sr. Croes si esaki ta algo cu scolnan ta cumpli cabalmente cu ne. “Tin protocol cu nos ta haci uzo di dje. Nos no ta laga un mucha tanto dia ausente. Nos tur ta purba semper bin hunto papia di dje. E maestro cu ta ripara prome ora e mucha no yega su klas, e lo tuma contacto cu mayor. Si no por hay’e, ta avisa mi persona.”

Registra ausencia
Pa locual ta registracion di ausencia, sr. Croes ta splica: “Nos ta registra en berdad.” Pero segun e cabesante, hopi biaha mayornan ta por ehempel bay afo cu e muchanan sin yena e formulario rekeri pa haci peticion na scol pa esaki cana su caminda anto ta bay cu e muchanan scondi, manera nos a publica anteriormente. “Si e mayor pidi dies dia di ausencia, scol ta dicidi anto e resto nos tin cu pas’e pa Bureau Leerplicht. Nos a pidi un formulario mas simpel caminda lo tin mas claridad cu no tin cu warda e dies dianan ey y por actua hopi mas prome.”

E cabesante ta splica cu den mayoria scol na Aruba nan no ta sinta warda un mucha no presenta na scol e prome dia, sin notificacion. Nan mes ta yama cas wak kico por a pasa pa wak unda e mucha a keda den e caso aki. Ta normal si cu scol ta pidi pa yama scol prome cu 9or di mainta si e mucha no por bin scol anto avisa e motibo pa kico e mucha no lo presenta.

Ta falta control
E punto cu a bin mas dilanti cerca e cabesantenan ta e parti di ley, por ehempel e parti di multa mayornan y con a para cu control/implementacion di ley. “Esey tin cu bay bek na minister wak kico ta bay pasa. Tanten cu no confronta e problema cu un mayor cu tin consecuencia mara na locual nan ta haci, nan lo sigui haci e.” Otro tema cu Bon Dia su editorial a subraya ta esun di caso di muchanan ilegal cu pa tratado y pa ley mester haya enseñansa, tanten cu nan y nan mayor (nan) ta permanece riba nos isla.
Riba e parti aki y otro puntonan pa repasa y aclaria manera diferencia entre leerplicht y schoolplicht nos lo trata den siguiente edicionnan.

Falta trahado social
Manera recientemente conoci, tin un trahado social cu ta trata cu demasiado scol na Aruba pa e por haci e su so, segun instancianan social a trece dilanti. Segun cabesante di Ora Ubao, tur scol ta diferente y mirando den transcurso di añanan e problema social den general a bira mas grandi. “Por ta den un aña na un scol bo por tin 12 mucha cu problema cu mester ayudo, pero na e otro tin un klas cu a bin seis extra, pues e ta keda crece.” Sr. Croes ta bisa nos cu no por premira cuanto trahado social lo ta adecuado pa un scol primario pero sigur actualmente locual cu tin ta tiki pa locual nan ta enfrentando. “Nos ta purba yuda otro pero ta yega momento cu tin casonan severo tambe cu e ta for di nos man tin ora pa yuda tur e muchanan aki.”

Follow up riba puntonan discuti
Na final di dia despues di topa cu Bureau Leerplicht, tur preocupacion a keda nota y scolnan a traha un sumario di tur e preguntanan. Nan a palabra cu despues cu Bureau Leerplicht reuni cu minister, nan lo reuni bek cu cabesantenan pa asina clarifica e puntonan. “E tabata un dia productivo pasobra nos a haya informacion y palabra con nos ta bay sigui traha hunto. Esey ta e idea cu no por tin un missing link cu no tin comunicacion. Nos tur ta na bienestar di enseñansa y den e caso aki p’esey OCEB ta purba pone link tur caminda”, e cabesante ta remarca.

OCEB
Tin reunionnan yama OCEB II y II: OCEB I ta e directiva cu ta reuni y planifica pa e siguiente OCEB II cual ta tur cabesantenan na Aruba. Den e OCEB I nan ta mira kico ta palabra y delinea kico lo traha riba dje cu cabesantenan, esaki ta nan structura. “Nos ta brinda den nos reunion informacion caminda cu tur cabesante ta riba mesun liña y tin mesun informacion cu ta desea, anto den un solo shot completo. Nos ta purba di tur manera pa trece nos preocupacionnan pa drecha enseñansa. Esey ta e meta di OCEB.”

Recientemente nan tabata tin un reunion cu minister di enseñansa. Nan a bay como directiva y den nan reunion locual nan a haci ta pone cuater punto pa traha riba dje: infrastructura di scol, cuido di alumno, cuido di maestro di curriculum. E cabesantenan a sinta den grupo y trece nan puntonan dilanti riba kico nan kier wak na cua categoria, elabora esakinan y presenta nan na minister debidamente. “Den un bista minister a haya tur cos cu ta pasando na scolnan y ken sa miho cu e cabesantenan.” Y mescos cu Bureau Leerplicht, e cabesantenan ya caba a palabra otro dia cu nan kier reuni cu minister atrobe pa bin bek riba e puntonan y wak con leu nan ta. Esaki ta un encuentro palabra pa sosode bek rond luna di mei.