E reciente reunion informativo cu ministro encarga cu Integracion (Dimas) y Labor a tene cu parlamento pa un parti a duna informacion relevante tocante e actual funcionamento di e departamentonan envolvi den e proceso di entrada y estadia legal di hende di exterior. Loke no a relata tanto ta con e strategia ta di gobierno encuanto integracion. E tema aki no ta abarca solamente e proceso di emiti permiso, sino con integracion den comunidad di e fluho considerable aki di stranhero lo bay. Kico ta e proposito? Mantene un stranhero mas tanto den un estado di estadia temporal? O al contrario crea e base pa permanencia definitivo, cu tur consecuencia pa infrastructura social y economico?
Nos no a tende un contesta contundente, mucho menos un splicacion mas extenso di e situacion bastante complicca cu ta existi desde e crisis di refugiado, principalmente di Venezuela, cu ta roga pa un splicacion di e caso di refugiado y di persona indocumenta en general. For di e preguntanan haci por comprende, no di e ministro sino di un parlamentario aparentemente bon informa, cu lo tabatin na tur 3930 peticion di asilo di cual 1800 ta den tramite ainda. Di otro banda otro vocero di gobierno, entre nan e propio ministro presidente, a yega di menciona cifra di 15.000 pa 16.000 persona indocumenta na Aruba, na momento cu ta papia di ‘refugiado’. Loke nos por conclui for di e detayenan cu nos a tende den e reunion aki ta cu e ‘problema di refugiado’ anto ta hopi mas chikito cu loke ta ser maneha como cifra general. E cifra di refugiado ta hopi mas chikito cu e cifra cu recientemente a pone nos den e categoria di un di e paisnan cu proporcionalmente tin mas refugiado. Awor, por tuma esaki como un preocupacion menos? Ta resulta cu gran parti di e indocumentadonan no ta refugiado? Parti di e contesta, y esey e ministro no a splica tampoco den e reunion, ta cu gobierno semper a hiba un maneho di desanimo di pidi asilo y tabata core pa e responsabilidad di duna informacion al caso. Te no mucho tempo pasa casi no tabatin peticion pa asilo, pero dado momento e personanan cu tabata yega a ‘siña nan les’ y a yega na conoce e tramitenan cu nan mester haci pa yega na e status di refugiado. Presion di Reino y instancianan internacional a haci cu mester a cuminza atende esnan cu solicita asilo. Asina mes, ultimo tempo e proceso di concede e status ey a keda paraliza, cu e propio ministro bisando cu te awor, desde e gabinete aki ta operando, el a firma un aprobacion di asilo so… No tabatin pregunta critico di parlamento ta ki manera di opera esaki ta.
Otro problema cu a toca den e reunion tabata e asunto di mucha cu ta indocumenta na Aruba y cu tin derecho di haya educacion. Scol no por nenga nan pero ora yega na diploma, nan no por hay’e pasobra nan no ta registra oficialmente. E mandatario a critica e situacion aki y a declara cu esaki ta inhumano. Nos ta di acuerdo cune pero esey no ta e pregunta cardinal. E pregunta clave ta: kico ta bay haci cu e situacion aki? Bo no por bin parlamento pa expresa bo lamento, como mandatario esaki ta algo cu mester a keda discuti entre e ministerionan concerni y bin parlamento cu un plan! Di otro banda mester bisa cu parlamento tambe, atrobe, ta hopi debil pasobra no ta cuestiona e hecho cu nan ta keda confronta cu lamento sin solucion, ademas cu nan mes tambe por pensa den e direccion di un solucion.
Loke nos a haya di tende di e intentonan cu lo ta haciendo pa mehora servicio, sin duda algun ta sumamente necesario, si e intencion ta pa e departamento perde algo di e status neagtivo ‘legendario’ cu e tin como esun cu ta nenga di sirbi pa algo. Mester bisa cu e mandatario mes tambe ta reconoce cu e departamento no ta ainda unda e mester ta. Esey ta di aprecia pero nos no ta convenci cu loke a presenta ta suficiente pa trece e cambio. Por ehemplo, un automatizacion 100% no necesariamente ta trece cambio den mentalidad cu tin 30 aña daña caba. Si no tin un control di proceso efectivo e retrasonan den tramitacion ta keda sucede. For di banda di sosten parlamentario pa e gabinete mes a bin ehemplo di con den cierto caso nada no a mehora ainda. E mandatario ta ofrece su propio intervencion den e caso, pero no ta esey ta e solucion. Un departamento mester por opera pasobra tin un gerencia adecua na mando cu ta garantiza un proceso agil, resolviendo e problemanan practico na caminda. Loke e ministro ta ofrece actualmente ta cu e mes ta tuma rienda di e departamento, firmando e mes tur permiso… Nos ta adverti recordando cu den pasado un familiar di e actual mandatario tambe a haci esey y e chasco ey no a termina bon. Hulanda mester a interveni pa pone fin na e iregularidadnan cu a surgi di esey.
Finalmente esaki: e mandatario a anuncia cu e directora no lo bolbe den e departamento. Di otro banda, e ‘bode’ cu un educacion desconoci cu a bira director adjunto bao di e anterior gabinete, si a keda den e team gerencial. Esey mester tipifica e cambionan planea?
