Ta pidi pa tur scol participa na “Ora di e Planeta”

Diabierna durante di conferencia di Prensa e grupo di Earth Hour a anuncia nan actividadnan cu nan lo tin e aña aki. E tema di Earth Hour e aña aki ta “Ilumina un luz ariba Accion Climatologico”. E un ora cu ta paga luz no ta mustra hopi, pero globalmente tur aña mas y mas hende ta participa, esaki ta yuda den e lucha den combati cambio di clima y dañonan haci na medio ambiente. E aña aki e evento ta diasabra 19 di maart 8:30 di anochi pa 9:30 di anochi.

E aña aki lo tin 3 actividad cu personanan cu kier trece un cambio por forma parti di dje. E idea tras di Earth Hour ta pa haci cosnan cu lo beneficia e medio ambiente den futuro den nos bida diario. E aña aki a dicidi di introduci un promesa cu yama “Less Plastic in my Home”/ Menos Plastic den mi Hogar. Segun Sra. Van der Biest: Cu e promesa aki nos kier curasha pueblo di Aruba pa uza solamente saconan sostenibel ora di haci compras y evita tuma saco di plastic na supermercado pa 30 dia of mas. Na momento cu esaki sosode, por saca un potret y post esaki riba Facebook Page di Earth Hour Aruba Community pa asina mundo mira con Aruba tambe ta tuma responsabilidad pa cu nos medio ambiente.

Caminata

Relaciona cu conscientisacion di e importancia pa pago bo luz, Earth Hour Aruba Comunity a organisa un caminata di 3 km tambe. Glow In The Dark Funwalk lo ta dia 19 di maart cuminsando 7or di anochi na Fort Zoutman. E ruta di e funwalk ta di Fort Zoutman-Talk of the Town- Vondellaan – Banco di Caribe – Fort Zoutman. Ta pidi pa participantenan bisti color neon y pa dorna nan pañanan cu luz. Band di esaki lo tin pa esunnan cu yega prome, articulonan di luz of cu ta ilumina anochi.

Segun Sra. Van der Biest ta splica, e prome 75 personanan cu yega na Fort Zoutman pa participa na e caminata lo haya un T-shirt blanco cu e logo di Earth hour completamente Gratis como recuerdo.

Evento paga luz

Despues di e caminata chikito lo tin un ceremonia cu lo bay tuma luga na Willem III Toren na Oranjestad cuminsando 8or y mey di anochi. Lo tin fruta pa participantenan di e caminata y cu ta presente pa e evento. Tambe musica, snacks y cos di bebe. Lo cende bela (manera añanan anterior), e biaha aki riba e logo traha na man di E.H. 2016

Participacion scolnan

Ya tin varios aña cu algun scol ta participante na Earth Hour. Hasta tin un fecha global pa esaki cual e aña aki ta dia 16 di maart di 8or y mey di mainta pa 9’or y mey di mainta. Scolnan sa participa pagando airco of luznan den klas pa un of mas ora. E aña aki Earth Hour Aruba Community kier kibra record di participacion na e evento. Pues ta haci peticion pa tur scol uni na e causa te con leu rooster di scol ta permiti.

Mundialmente

Miyones di hende den mas di 162 pais den tur continente di mundo lo uni nan mes den un solo momento pa celebra y contempla pa e planeta door di paga nan luznan pa un ora. Door di tuma parti den e evento di paga luz aki tur hende cu forma parti ta mustra di ta comprometi pa tuma accion na beneficio di e planeta pa e añanan venidero. Earth Hour a cuminsa na aña 2007 na un solo ciudad, Sydney, Australia y desde eynan a crece bira un movemento global cu miyones di hende creando asina e evenemento mas grandi den historia pa cu nos medio ambiente.

Algun di e obranan di ingenieria y arkitectura mas famoso y monumentonan natural, incluyendo Forbidden City na Beijing, Eiffel Tower na Paris, Table Mountain na Kaapstad, Great Pyramids di Egypto, Buckingham Palace di London, estatua di Cristo Redentor di Rio de Janeiro, Niagara Falls y Empire State Building di New York State, Sydney Opera House ta djis algun di tur e icono nan famoso cu lo para den scuridad pa un ora of mas largo cu un muestra di poder cu nos ta comprometi pa tuma rienda di e cambio climatologico global.

Preocupacion

Earth Hour Aruba Community Group (EHACG) a wordo funda na aña 2011 cu e meta pa curasha Gobierno, empresanan priva, gremionan y specialmente e comunidad completo di Aruba pa participa na e evento global aki. “Earth Hour Community Aruba ta preocupa masha hopi mes pa e futuro di nos planeta y desde nos inicio nos tur a compromete nos mes pa stimula conscientisacion di nos pueblo y pa pone man na obra pa colabora cu diferente partnernan cu te envolvi cu accionnan. Entre otro pa tene Aruba limpi, promove agricultura, reduci consumo di energia y otro iniciativanan cu ta promove sostenibilidad di nos isla y henter mundo.

Door di paga tur luz no esencial di casnan, establecimentonan comercial y edificionan di Gobierno durante e Earth Hour 2016, lo ta un muestra di compromiso pa un accion positivo pa conserva e clima di nos planeta. Hunto nos lo por contribui na e anhelo global pa resolve y realisa nos rol como wardadonan di e planeta pa proximo generacionnan, den miho condicion cu nos a haya esey.

Finalmente a bisa cu Earth Hour 2016 lo ta mas grandi cu añanan anterior. Y ta spera cu Aruba realmente ta uni na e meta pa paga luznan di cas y establecimento y tambe stimula bisiña y amigonan pa haci mescos durante e ora stipula, esta diasabra 19 di maart di 8or y mey pa 9or y mey di anochi.

Cada aña, cada pais cu forma parti na Earth Hour tin un diferente motibo pa haci esaki. Por ehempel e aña aki Rusia lo ta envolvi na Earth Hour unda cu nan lo ta uzando e evento como un manera pa haci peticion pa prohibi companianan di rosa mondi y corta matanan. Esaki lo ta e di 10 aña di e campaña mundial di conscientisacion. Algun logronan di paisnan desde inicio di Earth Hour ta cu areanan proteha pa naturalesa cu tabata na riesgo, no a wordo mishi cun’e mas na Argentina. Panel Solar a wordo poni den tres ciudad sin coriente na India. Programanan di educacion a inicia y miles di luznan LED a wordo instala rond na Merca, esakinan ta solamente algun logro cu e campaña tin.