E dianan di tiramento di klapchi a yega. Tambe e tiramento di pagara den varios luga riba caya. Di parti di DOW kier enfatisa pa cumpli cu regla y coopera cu otro pa fin di aña.
Marlon Croes, director di DOW a duna di conoce cu un punto di atencion cu nan tin sigur ta Caya Betico G.F Croes. El a wordo renoba por completo y a dedica tempo na dje.
Sinembargo, e ta bisa cu tur hende como ciudadano na Aruba mester coopera cu otro pa cuida caya. E ta pidi pa e mesun cooperacion pa esunnan cu ta bay tira klapchi na henter caya dilanti nan negoshi.
Cada parti di caya lo tin un orario, esey ta mescos cu tur aña, mirando cu nan tin ekipo di DOW y hende prepara di Serlimar pa nan por haci limpi di biaha pa ora aña habri ‘caya ta full limpi’.
Croes ta comparti cu tur e tiramento di klapchi lo ta permiti, nan a manda carta na tur luga den caya pa asina nan sa di ki ora pa ki ora nan tin cu caba, pa asina DOW por haci nan trabou. “Si nan cuminsa tira ‘random’, nos trabou ta bira mas largo y intensivo.”
Segun Croes ta enfatisa cu e orario lo keda mara dia 31 december den tur orario di punta di caya te cu otro punta. E ta splica cu di 11am te cu 2pm tin luga cu por. Despues di 2pm te cu 4pm e otronan por tira. Di e forma ey nan por haci nan trabou y keda cla na tempo pa nan colega por bay cas y fresh up pa cada hende por cera y habri aña cu nan famia.
E ta bisa cu asina tur aña a cana bon,. Sinembargo aña pasa tabatin algun punto cu a siña di dje. Pero ta bon pa tur hende coopera cu otro pa tur cos caba bon.
Pa finalisa Croes a comparti mensahe pa fin di aña: “Tin drukte na caminda.” E ta pidi pa “hende ta huicioso e fechanan aki ora di maneha auto y no core bou influencia di alcohol. No haci uzo di celular ora di core auto y ban cera aña bon y desea henter comunidad bon comienso di aña 2020.”
