Ta pidi comunidad cuida di animalnan debi na temporada di klapchi

Temporada di Pasco y Aña Nobo ta un celebracion bunita y cu ta trece felicidad, unda tur famia ta reuni. Pero den dje tambe tin e tradicion di usa klapchi. Cu esaki Bon Dia Aruba kier trece un tiki di informacion tocante e topico aki, unda e bestianan ta esnan cu mas ta wordo afecta.

Klapchi, cu ta consisti di material explosivo y cu por produci reaccionnan como un candela, ta causa hopi daño na e bestianan, ta p’esey cu expertonan di medio ambiente como tambe dokter y veterinario ta recomenda pa no haci uso di klapchi, debi na efectonan secundario cu nan por provoca tanto den personanan cu tin autismo, como pa bestianan y medio ambiente.

Aunke pa hopi hende e klapchi ta algo cu ta hala atencion y ta leuk, e bestianan ta bira e sernan mas vulnerabel den dianan aki. Hopi biaha veterinarionan a señala cu klapchi tin consecuencianan grave pa nos mascota, unda algun di nan por hasta perde nan bida y no pa via di un explosion precisamente, sino pa e zonido fuerte cu nan ta provoca.

Expertonan ta sigura cu e zonido di klapchi por afecta entre un 30% pa 40% di e cachonan, nan tin e horea mas sensibel pa loke klapchi por afecta nan aumenta nan nivel di stress.

Pa loke ta trata e pushinan, nan ta bestianan teritorial cu mester sinti cu nan tin su teritorio bao control. Pa e motibo ey nan no ta gusta e sorpresanan y ademas nan tin nan horea hopi mas sensibel cu esun di un cacho. Nan no ta custuma y nan por asocia e zonido cu un situacion di peliger na nan bienestar, ya cu na diferente di e personanan, nan no por ripara si explosion ta representa un peliger real.

Ta p’esey cu ta recomendabel pa doñonan por busca un luga sigur pa nan sin core e riesgo cu nan por scapa di nan mesun cas, no usa klapchi mucho cerca di e bestianan, mantene un potret actualisa di dje y sigura cu nan tin un ID cu un telefon den caso cu nan por huy.

Si ta posibel, warda nan paden di cas of den un bon refugio cu por proteha nan di solo, awasero, biento y caida di klapchi, si ainda nan ta continua cu mucho nervio por pasa cerca un veterinario of usa un trankilizer pa calma nan nerviosismo.

Esaki ta algun di e recomendacionnan cu plataforma ley di cacho ta ofrece pa e dianan di fiesta aki.