(CuraçaoChronicle) – Gabinete Pisas a tuma decision cu for di awo, ministernan por tin 7 empleado den gabinete na lugar di e actual 5. Esaki ta pa ‘cumpli cu e necesidad pa capacidad y sosten pa e gabinetenan di e ministernan’, gobierno a bisa.
Usualmente ministernan ta contrata famia y amigonan pa e posicion aki. Esaki ta financieramente mas atractivo cu ta un ambtenaar regular, pasobra ta paga un suplemento di 25% ademas di e salario regular, ‘ya cu empleadonan di gabinete ta ehecuta un tarea special’.
E momento cu ta tuma e decision, cual su gastonan anual ta entre 2 y 3 miyon florin, ta remarcable: gobierno di Corsou ta completamente dependiente riba sosten di likides di Hulanda pa paga salario di ambtenaarnan. Un di e condicionnan mara na esaki ta cu ta yena solamente vacaturanan crucial.
E decision a sorprende lider di fraccion Sheldry Osepa di partido di cualicion PNP. E ta bisa riba Facebook cu e ta curioso pa cu e argumento. E tambe ta destaca cu e pais ta memey di un crisis cu a causa cu hende a perde nan trabao y ta hay’e dificil pa pone pan riba mesa.
