Te ainda ta existi cierto duda pa loke ta trata uso di palapa na e beachnan di Aruba. Den esaki, hasta turistanan ta puntra si uso di palapa ta publico, si stoelnan tambe ta publico of si ta pertenece na hotelnan of na companianan di watersport.
Riba Facebook ta existi varios comentario riba e topico aki cu Bon Dia Aruba ta bay trece dilanti y lo puntra na instancianan concerni kico ta e maneho pa cu esaki.
Tin hendenan local cu a sigura cu e uso di palapa na beachnan ta keda uno gratis, pero ta bin dilanti e pregunta si e palapa ta pertenece na un hotel, kiermen si ta construi dilanti un hotel y ta p’esey ta exclusivo pa clientenan di e hotel en cuestion.
Incluso tin algun comentario di hende cu ta indica cu ta intimida y spanta e hendenan bisando nan cu no mag di usa e palapanan, debi cu mester huur. Ademas den varios caso manera esaki, hasta polis mester a actua debi na esey.
Palapanan ta disponibel na diferente beachnan di facil acceso como Eagle, Arashi, Baby Beach, Boca Catalina, Malmok y Mangel Halto y nan ta keda beachnan publico incluyendo nan palapa. Sinembargo, segun e website www.visitaruba.com ta señala cu uso di palapa incluso dilanti di un resort ta di uso publico, pero si ta pertenece na e hotel of si ta den tereno propiedad di e hotel, manera cerca di e pool of kant’i di lama, su uso ta pa nan clientenan. Cada hotel tin nan reglanan y regulacion pa uso di palapa ora ta trata di nan clientenan.
