Ora un candidato presidencial ta yega e urna hunto cu su famia, ta sigur pa asumi cu su pareha lo vota p’e. Pero e aña aki, e voto di Kim Kardashian pa su esposo a keda poni den duda for di algun dia caba.
Diasabra ultimo, despues cu a anuncia cu Joe Biden a logra e cantidad di voto necesario di Colegio Electorial pa consagra su mes como presidente electo, e duda a converti den sorpresa. Esaki pasobra Kardashian a publica un serie di tweet celebrando e resultado di e eleccion.
Den e prome, Kardashian a comparti un imagen di Biden cu vicepresidente electo, Kamala Harris y a compaña esakinan cu tres curason blauw. Tiki mas cu 40 minuut despues, Kardashian a re-tweet e video di Harris dunando e noticia na Biden via telefon, cu tres curason cu e colornan di bandera Mericano. Y algun seconde despues, el a comparti tambe un tweet di Biden, igualmente cu e curasonnan.
Maske cuatro aña pasa Kim Kardashian no tabatin problema pa comparti su preferencia electoral y abiertamente a sostene Hillary Clinton, na 2020 el a nenga di publica pa ken el a vota. Kardashian, di 40 aña di edad a mantene su secreto te na ultimo momento, pues diamars ultimo el a publica un imagen cu e sticker famoso di ‘ami a vota’, pero despues a elimina esaki pa hende no pensa cu su blusa cora tabata nifica cu el a vota pa Trump.
Pero e criticanan a continua, y Kardashian a ricibi cantidad di tweet cuestionando si el a vota pa su esposo Kanye West. Finalmente, algun fanatico a ripara cu Kardashian a ‘like’ tweet di Harris y otronan sosteniendo Biden, pero el a elimina esakinan di su cuenta tambe.
Ademas di protege su matrimonio, e posibel motibo cu Kardashian no a bisa claramente pa ken el a vota por ta e trabao cu el a haci cu presidente Trump den un reforma di prison.
Durante un entrevista cu David Letterman, graba prome cu pandemia di Covid-19, Letterman a puntra Kardashian si ya e tabata sa pa ken e lo vota, pero el a dicidi di no bisa nada.
Den e entrevista, Kardashian a profundisa riba e tema y e advertencia cu el a ricibi prome cu asocia cu e mandatario actual. “Hende a bisa mi: ‘no tribi di drenta Cas Blanco of bo reputacion ta caba’. Y loke mi a bisa: ‘mi mester hinca mi mes eynan of hende di e bida aki no tin oportunidad’”, el a recorda. El a agrega cu en berdad e ta aprecia loke Trump a haci pa avansa reforma y yuda hende cu ta den prison pa condena inhusto.
