Ta papia hopi… Sin reforma concreto…?

Dentro di nos tarea pa informa publico di e temanan importante pa nos pais, nos a dedica bastante atencion na cierto documento cu nos ta considera den e categoria aki. Nos publicacionnan ta refleha obhetivamente loke ta describi y proponi den e documentonan trata. Esey no ta implica cu nos lo ta di acuerdo cu loke ta propone, o por ta cu nos tin duda tocante e trayecto di implementacion cu mester sigui despues di presenta plan. Plan presenta sin ‘follow up’ ta finalmente papiamento den bashi, ora resulta despues cu e anuncio mes di e plan tabata e accion mas concreto cu nos a mira. Y pakico esey ta asina?

Aki por tin varios motibo. Un di nan ta cu tin ora ta presenta plan cu ta demasiado curu ainda, estudio di factibilidad no ta haci ainda, o no tin inversionista concreto pa carga e proyecto, no a envolve ainda otro instancia gubernamental cu mester haci nan trabao, mester tuma cierto paso legislativo cu ta costa hopi tempo, etc. Sin embargo, den cierto caso nos ta keda haya e ‘anuncio’ di e proyecto como sifuera algo realizable pronto. Ehemplo? E famoso ‘fast ferry’ cu pa e trayecto larguisimo cu e asunto aki a tuma, dificilmente por carga e nomber ‘fast’ ainda. Y kico ta concretamente e problema? Entre otro, cu te awe nos no a mira e estudio di factibilidad, cu ta atende na un manera serio y profesional e varios obstaculonan cu a primera vista ya ta aparece. Entre otro ta trata di investigacion y prueba palpable di presencia di e volumen necesario di pasahero y carga, pa hustifica su viabilidad. E pregunta clave ta, si existencia di un ferry por bay bira un competencia fuerte pa transporte entre e islanan, mientras esaki a adapta pa hopi aña caba den direccion di casi exclusivamente transporte aereo. Nos ta comprende cu lo mustra riba e costo enorme di aviacion regional, cu ta sumamente caro compara por ehemplo cu transporte aereo na Europa. Biaha pa Barcelona for di Amsterdam (mas di 2 ora di vuelo) ta hopi mas barata cu bula di Aruba pa Corsou, esey pa hopi aña ta asina caba. Nos no ta anto contra yegada di un alternativa asina, e lo ta bonbini, pero no mester rabia ora ta critica e anuncio, pa di tantisimo vez, di e mesun ‘plan’ atrobe…

Otro ehemplo, un poco diferente. Nos tin decada largo ta papia caba di ‘streamline’ e proceso di start up negoshi legal. Pa bisa e cos bon cla, nos no ta mira tanto cambio cu realmente lo haci un diferencia pa inversionista, local y di exterior. Loke nos ta mira, di e poco detaye cu a sali te awor, cualkier persona cu mester lanta un persona huridico ta keda toch cu un proceso di varios luna promer cu e compania ta registra y tin permiso pa opera. Pero…, no tabatin consulta amplio atrobe entre gobernacion y e gremionan empresarial? Si, corecto, atrobe, pero ainda nos no ta mira e avancenan cu nos ta considera necesario. Laga nos splica loke nos kier bisa di e siguiente manera: con nos ta kere cu na otro pais nan ta logra corta e tempo pa lanta un negoshi, haciendo asina e lugar specifico ey un lugar atractivo pa lanta negoshi? Esey pasobra nan ta facilita lanta negoshi, cortando den e proceso previo di control, di cual un parti ta ‘muda’ pa despues cu e compania ta opera caba. Contrario na esey, na Aruba lanta un negoshi ta manera ‘drenta cielo’: tanten bo no logra pasa San Pedro, bo ta den problema, pero unavez bo drenta, ningun hende ta molestia bo mas, pa eternidad… “Con esey por ta?”, lo ta e pregunta legitimo. Esey ta asina pasobra e aparato publico ta asina deficiente den su tarea di supervision y control, cu te awe esaki ta un di obstaculonan grandi pa gobernacion por avanza. Hasta cos a yega asina leu cu un biaha un hotel a hiba gobierno y Camara di Comercio corte, pasobra despues di tanto aña ainda nan no tabatin un permiso pa e director funciona legalmente. Ironia tabata ora huez a sentencia cu e compania y e director no tabatin un pia pa para ariba, pasobra nan mes a bisa cu gobierno nunca ta interveni ora un compania ta viola ley y no ta stroba ningun compania opera den violacion, pasobra no tabatin un practica, considera den tur pais como algo normal, pa revoca bo permiso si bo no ta cumpli; no na Aruba… Ta pesey, si no ta bin cambio drastico den e forma di opera di gobernacion, unda en general no tin un enfasis riba e supervision di cumplimento, y actuacion adecua sin distincion di amigo ni famia, nos no ta mira tanto ta mehora. Naturalmente nos ta comprende pakico no ta bin mas exigencia di tur banda pa mihor control: e falta di control ta conveni hopi di nos, aunke nos no lo admiti esey. Si bo confronta un persona, por ehemplo un empresario, cu e asunto di falta di control, nan tur lo declara en voz alta cu “claro, mester tin control”. Pero mester tin un motibo pakico nos politiconan no mester preocupa cu e tema aki; esey ta pasobra practicamente nunca nan ta haya comentario, mucho menos den prensa, cu mester haci algo den e sentido aki. Y asina nos ta keda pega den e repiticion di e ‘intentieverklaring’ interminable, unda ta bisa nos cu ‘lo bay haci algo…’ Ta straño anto cu e reaccion popular ta: “Hay que ver para creer”?