Aparentemente tin un buraco hopi grandi ora e ta yega na haya historia di muhenan cu Caribense cu a lucha online. Christie Mettes di Metabolic foundation Ta conta Bon Dia Aruba kico ta pasando y con por haci un cambio.

E fuente di noticia BBC, recientemente a bin cu un iniciativa yama “100 women 2016” y con pa revoluciona e Wikipedia cu storianan di hende muhe.
Mettes ta conta “Tur hende conoce Wikipedia. Pa e studiante, e profesional of cualkier persona cu un curiosidad y smart phone Wikipedia ta e solucion pa cura bo curiosidad. Un fact-check lihe lihe, ora bo no ta confia un post riba facebook of den un discusion cu un colega. E enciclopedia publico y colectivo unda un y tur por contribui a crea hopi acceso na informacion pa hende rond mundo. Y a wordo confirma dor di varios estudio cu e ta un fuente confiabel di informacion. Esey ta behalve si bo kier sa algo over di Aruba, Caribe, of hopi otro luga cu no ta Merca of Europa Occidental.”

No tin diversidad
Segun Mettes, tin un tekort hopi grandi na informacion pasobra e grupo cu ta contribui na articulonan no ta uno diverso. E hoben ta bisa “ Wikipedia ta un enciclopedia publico unda un y tur por skirbi nan articulo. Pero en realidad tin un grupo chikito, cu ta contribui mayoria di e informacion y, e grupo aki ta relativamente y demograficamente representa pa 85% hende homber mayoritariamente blanco cu un enfoke riba IT. Mi ta sigur nan ta haci un hopi bon trabou pero esaki ta resulta den un efecto unda hopi realidad y storianan no ta representa.

Un investigacion di BBC a mustra cu di tur e articulonan over di hende solamente 17% ta over di hende muhe. Ademas e team di editors ta pone hopi duda riba inclusion di hende cu no tabata tin un impacto den e mundo occidental. Si nos busca pa Aruba mayoria articulo di Arubiano ta hustamente nombra e persona cu un evento unda nan a participa. Ademas esaki ta representa dor di mayoria participante den concurso di beyesa y deportista. Cosnan cu podise ta valioso pero no formativo pa nos historia. Esaki ta un limita nos capacidad pa conta y comparti nos historia den un mundo constantemente mas digital y internacional. Pa busca bo mesun historia ora bo no ta na Aruba, of ora bo ta na Aruba mes”

Tur hende por yuda
Mettes ta haci un apelacion pa e pueblo di Aruba, of esunnan cu di un manera conoce muhenan remarcabel pa nos historia pa contribui. Tur hende ta wordo invita pa forma parti di e proceso di investigacion y skirbi articulo pa caba te kort cu tin ora e ta yega na muhenan den enciclopedia y nos historia.  Mettes ta subraya “E articulonan di BBC obviamente a keda cu un enfoca hopi mas Occidental, ban agrega articulo over di Caribe.

Nos di Metabolic Foundation ta un organisacion activo na Aruba, cu a inicia Brenchie’s Lab y Plastic Beach Party, nan meta ta e democratisacion di tecnologia.  Entrante 2017 lo cuminsa un working group pa agrega e storianan cu nos ta haya cu haci falta riba wikipedia, di e hendenan cu a haci un impacto den nos historia y presente, cu un enfoca riba hende muhe. E grupo ya tin varios Rubiano notabel cu ta interesa pa contribui e grupo final, e lista completo lo bin dilanti una bes cu e articulonan cuminsa wordo publica. Pa esunnan cu ta interesa por e-mail lab@brenchies.com pa participa of manda sugerencia di hende notabel den nos historia.”