Caribbean Linked renombra den region

Na caminda pa Caribbean Linked 2018, e fundado di e proyecto ta combersa cu Bon Dia riba e impacto cu e proyecto aki tin den region compara cu e impacto minimo cu e tin riba Aruba. Alabes ta combersa riba un exodo di artista percibi y e importancia di tin personanan cu ta compronde e importancia di arte y e ampliacion di e terminologia di cultura den posicionnan cu por yuda artista.

Manera nos a publica den nos edicion anterior, Edjean Semeleer di Go Cultura Foundation a trece dilanti cu e interes y sosten pa arte y profesionnan creativo na Aruba ta un problema cu no solamente ta afecta e artista, si no tambe e ta afecta sociedad den su totalidad. Despues di a combersa cu sr. Semeleer riba e topico, Bon Dia a papia cu e organisadonan di e evento renombra den mundo artistico di nos region, Caribbean Linked, cual manera ta conoci ta tuma luga na Aruba cu participacion di artistanan contemporaneo di Caribe.

Profesion creativo no considera un opcion valido

Den e combersacion cu Bon Dia a tene cu e organisado y fundado di e proyecto, Elvis Lopez, e ta conta con pa hopi aña e como director di Ateliers ’89 a sa di carga e proyecto di e academia di bellas artes dilanti, aunke ta falta un infrastructura pa laga sector cultural floria riba nos isla. Mescos otro personanan activo den e ramo aki, sr. Lopez ta conta cu pa mayoria di persona e importancia di esaki no ta reconoci, pues e ta bira un lucha casi solitario.

Pero e por wak cu e necesidad pa amplia e curiculo di creatividad ta importante, specialmente pa personanan cu bo no lo considera normalmente como artista. Sr. Lopez a conta di un hoben di EPB cu tabata clasifica den e clase mas abou di e structura na EPB pero cu ora el a yega Ateliers ’89 el a resalta den su obranan durante e tayer cu el a tuma. Di e combersacion aki nos a haya e impresion cu mirando cu hopi biaha un interes den arte of cultura no ta sigui forma den un interes pa sigui un profesion creativo, specialmente pasobra normalmente no ta considera esaki como un opcion serio, hopi di e hobennan aki no ta sigui cu e potencial cu nan tin.

Escogencia duro como artista

Sr. Semeleer tambe a refleha den nos combersacion cu ne, despues di a mira e ultimo obra di Alydia Wever na Aruba. E ta haya cu personanan creativo riba nos isla hopi biaha ta enfrenta un decision di keda aki na Aruba y sigui inverti den e industria aki maske ‘añanan ta pasa y no mucho ta pasa’ of bay afo pa asina sigui explora posibilidadnan di manera positivo. “Aya nan ta crece como ser humano y como artista y aki bo ta sinti manera bo ta keda stanca. No tin un museo di arte contemporaneo ni mas importante un consciencia di con importante di berdad e ta pa tin plataformanan constantemente pa creativonan por expone nan arte, den cualkier forma cu esaki ta tuma.”

Biniendo bek riba Caribbean Linked, sr. Lopez ta splica cu den region e proyecto aki ta un di esunnan mas importante pa mundo artistico, mirando cu tin poco movemento colectivo asina despues cu varios biennal a stop. “Ora nos bay otro pais sea den Caribe of Europa, ta di Caribbean Linked so nan ta papia. Pues e ta un situacion unda pafo di Aruba Caribbean Linked ta mira como algo importante mientras na Aruba e ta manera cu e ta.”

Conexion entre culturanan y oportunidad pa artista

E director di e scol di arte a conta cu e proyecto aki pa trece diferente artistanan y hende creativo hunto di diferente paisnan den region, cual hopi biaha ta consisti primordialmente di hoben, ta duna oportunidadnan na nivel internacional pa personanan cu ta participa cu ne. Esaki ta pasobra e participantenan ta haya chens pa combersa cu curadornan internacional. Asina por a mira cu Tessa Mars di Haiti a haya un grant (financiamento) di Davidoff Initiative pa bay un residencia di arte na New York. Artista Arubano Robin de Vogel tambe a haya e oportunidad pa bay riba un residencia den exterior despues di a participa den Caribbean Linked.

Algo notabel cu a bin dilanti durante e combersacion cu sr. Lopez tabata e echo cu arte ta crea brugnan di comprension entre culturanan, cual tin un rol importante den un sociedad multicultural manera Aruba. Nos propio editor a bishita un di e ‘Black Box talks’ durante un edicion di e proyecto den pasado y aki e artista sra. Mars a conta con e inspiracion pa su pinturanan personal tabata un parti di religion di Haiti, esta Voodoo. El a amplia riba esaki e tempo ey bisando cu aunke Voodoo tin un percepcion negativo rond mundo, esaki ta pasobra no ta compronde kico e religion ta encera, esta un amor pa bo mes como individual.

“Haiti y hopi otro paisnan tin nan cultura precioso cu na Aruba nos no ta tuma tempo pa compronde maske nos tin e oportunidad pa intercambia.”

Importante pa personanan cu conexion cu mundo di arte ta den posicion
Sr. Lopez a remarca cu e desconexion entre Caribbean Linked su percpecion pafo di Aruba compara cu su percepcion na Aruba ta mustra posiblemente cu e ta algo di no solamente sociedad si no di politica tambe. “Mi ta wardando lunanan pa un cita cu e minister di cultura cu casi 30 punto di agenda pero mi no a haya contesta te ainda.”

Esaki ta yega na e esencia unda den posicionnan clave pa haci un diferencia pa artistanan mester tin un persona cu, si no ta un artista su mes, aunke sea lo mester tin afinidad pa arte y creatividad na cierto nivel. Esey ta loke Go Cultura Foundation ta purba cu nan directiva cu ta tuma proposicionnan di artistanan pa cofinanciamento. “Hende cu ta compronde e esencia y con importante e ta. Por ehempel nos tin un hende den e board cu ta mas un consehero huridico pero e ta hopi envolvi den arte, pues e no por basa su pensamento solo riba e parti huridico comprondiendo cu ta haci falta di incentiva pa mundo creativo.”

Sr. Lopez den nos combersacion a toca e aspecto aki tambe, unda di loke el a tende di un curador local, ta tarda 5 generacion pa asina e tipo di cosnan aki cuminsa cambia structuralmente despues cu e pensamento cuminsa cambia. “Mi mes ta sorprendi pasobra mi por wak awo caba tin hoben cu ta studia ta bin bek y ta drenta den posicionnan den un ministerio por ehempel unda e por influencia e pensamento pa ta uno mas moderno y habri di loke normalmente tin den un tal esfera.”