Ta mirando opcion di vivienda ‘bayendo halto’

Director di DIP (Departamento di Infrastructura y Planificacion), Haime Croes, a splica mas den detaye tocante ROPV y algun regla cu mester tene na cuenta den cua bario y kico mag haci eyden tambe cu ta mirando opcion di vivienda pa construi bay halto.

Croes ta bisa cu pa cada area tin un ROPV (Ruimtelijk Ontwikkelings Plan, met Voorschriften; Plan di Desaroyo Teritorial, cu Regla) unda tin describi kico ta permiti den cada bario specificamente. Riba e website di DIP por haya un mapa digital, unda por primi riba un cierto area, anto ta aparece loke ta e rekisitonan di e area specifico ey. Por ehemplo, bo por primi‘landelijk gebied’ anto ta haya e reglanan pa e area ey. Por ehemplo, cu den e area ey tin cierto restriccion pa e tipo di vivienda, no mas cu dos piso, of no por traha apartement, of un negoshi.

Tambe den un cierto area no mag haci cierto actividad, y ta indica kico si por haci den e area ey. “Ora ta trata di vivienda tambe tin regla na unda por construi, y kico por construi. Nos tin cu percura pa nos pone e reglanan di ROP sigur riba e terenonan cu ta bashi ainda.”

Croes ta expresa di otro banda cu ta purbando di cambia e funcion, mirando cu no tin tanto espacio bashi mas. Esey ta pone cu den e ROP e parti di traha vivienda ta bira hopi importante y cu ta mirando hunto cu un comision pa por pronostica cuanto cas lo mester bin acerca na Aruba, tumando na cuenta e espacio disponible.

Di e forma ey por bisa caba cu nos ta obliga di bay construi ‘bayendo halto’ cu edificio di varios piso pa por ubica hende suficientemente pa loke ta vivienda. “Tin cierto regla den construccion y regulacion nobo compara cu antes tempo cu hende tabata traha cas. Awor nos tin e ley cu ta e ‘framework’pa e Plan di Desaroyo (ROP) y nos ta bay haya awor e ROPV cu ta e plan detaya pa cada area, cu lo bay drenta na vigor,” Croes ta splica.

Pa loke ta vision di gobierno, Croes ta amplia cu nan kier un desaroyo duradero cu ta contempla cuido di naturalesa, por ehemplo pa proteha rooi den ROP; tambe cu gobierno ta stipula cu si tin tereno cu kier rosa cu ta mas cu 750 meter cuadra, mester pidi permiso pa proteha e parti di naturalesa.

Croes tambe a splica cu mester tene cuenta cu e matanan cu tin proteccion legal. Importante ta tambe pa stimula pa planta mata local unda hende ta biba, pa asina keda cu e parti berde cu ta importante pa salubridad y bienestar general.