Investigacion efecto di azeta riba mangel
‘Ta manera niun hende ta worry cu mangelnan’, un studiante hoben envolvi cu e investigacion riba e efecto cu lekmento di crudo tin riba mangelnan ta conta Bon Dia. Esaki despues di mira cuanto hopi mangel morto tin.
Studiantenan di afo cu ta bin bishita nos isla pa caba nan tesis ta sumamente interesa den nos naturalesa. Asina nos a bin ta mustra cu Annemieke Drost kende ta studiando e salud di coralnan na Aruba. Un otro fenomeno den nos naturalesa cu ta importante pa coralnan y hopi mas bida marina ta mangelnan. Actualmente Emmeline Long, un studiante di Inglatera na University College Utrecht (UCU) den colaboracion cu Universidad di Aruba (UA) ta purba haya sa kico efecto di leknan di azeta den lama tin pa eco sistema di mangel.
Sra. Long ta splica cu pe scoge mangel como topico di investigacion no tabata dificil, mirando cu 80% di bida marino ta depende riba eco sistemanan cu mangel ta brinda, sea directamente of indirectamente. Pero mas specificamente e ta haya cu mangelnan ta hunga un rol importante tambe den e factornan economico na Aruba.
Esaki ta pasobra segun e studiante, mangel ta preveni hopi erosion di tera. Den su estudionan sra. Long ta enfocando particularmente riba efecto di azeta riba mangelnan, mirando cu el a tende cu tabatin un derame di azeta 2 aña pasa na WEB. P’esey el a compara mangelnan na area di Balashi WEB cerca di Palm Island cu Mangel Halto.
Aunke su investigacionnan no a determina nada te awo, mirando cu e falta evalua e data y caba di midi cierto cosnan na Balashi, tin indicacionnan cu e estado di mangelnan entre e dos areanan tin un impacto hopi diferente pa bida marino na ambos localidad.
Manera sra. Drost a indica na nos anteriormente, den su investigacion el a mira cu coralnan na Palm Island ta practicamente ‘inexistente’. Esaki contrariamente na Mangel Halto, unda segun e, tin hopi coral bunita mas leu di oriya.
‘Trece naturalesa mas cerca na curason di comunidad’
Sra. Long mescos par di otro studiante di UCU y UA ta purbando pa envolve comunidad tambe den e investigacon cu e ta haciendo. Asina nos por a mira ora nos a presenta na e sitio unda nan tabata tuma sample nan di tera y blachi di mangel hunto cu boluntarionan di comunidad y studiantenan di UA su programa Academic Foundation Year.
Midiendo e gordura di e matanan entre otro e medidanan cu nos a describi, e studiante ta haya sa cuanto carbon (CO2) tin den e matanan, asina determinando si tin polucion di azeta of crudo den e mangelnan. Di e maneranan aki por haya sa cua diferencianan tin entre mangelnan banda di Palm Island cu Mangel Halto.
Danick Netto di AFY na UA kende ta participa den e investigacion, ta conta Bon Dia cu e ta haya interesante traha activamente en bes di solamente den un lokaal na scol. Algo cu a resalta pa e studiante ta cu tin hopi mangel morto na Mangel Halto. “Ta manera niun hende ta worry cu e mangelnan.”
No tin hopi estudio haci
Sra. Long a señala cu no tin hopi estudionan publica riba mangelnan, aunke un persona cu a haci e intercambio cu e ta parti di dje den pasado a publica un estudio riba efecto di plastic riba mangelnan. “Hopi tiki cosnan ta digitalisa y ta online. Mi mester berdaderamente papia cu e hende corecto pa mi haya datonan.”
Sra. Long ta spera cu por medio di su investigacion e por subraya e importancia di mangelnan pa comunidad en general. Pero mas aleu e ta spera cu companianan manera WEB y e refineria– ‘si e habri’– tene cuenta mas cuenta cu naturalesa den nan maneho. “Por ehempel por medio di evita cu un oil spill afecta naturalesa den futuro.”
E mester gradici Leopoldo Henriquez, kende ta un ingeniero kimico cu a bay cu pensioen. “El a conta di tur loke e sa riba deramenan di azeta den contexto di Aruba pero tambe internacionalmente. El a duna mi acceso na hopi documentonan tanto digitalmente como riba papel. Mi ta hopi gradici pa su ayudo, pasobra sin dje mi lo no tin informacion pa basa hopi di e investigacion.”
Sinembargo sra. Long ta finalisa bisando cu si ta envolve comunidad den topiconan di naturalesa asina por crea mas relevancia y mas un sintimento cu en union tin forsa. “Ta miho si e sintimento no ta manera tin hende haciendo investigacion y ya. Si no cu hende mes por participa tambe.”
