Prome di a finalisa su mandato, Gabinete Mike Eman II a presenta un ley na Parlamento cu ta elimina incertidumbrenan na momento di haci transaccionnan via medionan electronico, como tambe garantiza derecho y obligacionannan cu ta surgi for di acuerdonan comercial cera den forma digital; un ley cu ta brinda seguridad legal pa usuarionan y ta duna e firma digital mesun balor legal cu un firma fisico. “Cu e ley aki Aruba lo yega un paso mas cerca di un economia moderno caminda lo a crea e structura legal pa, entre otro, e-commerce,” sr. Arends Parlamentario pa partido AVP, a splica. “Sinembargo, tratamento di e ley aki a wordo posponi pa un tempo indefini.
“Ta di lamenta cu tratamento di un e ley asina importante pa por garantisa bon conducta di comercio electronico a wordo posponi pa un tempo indefini,” e parlamentario a splica. “E ley tabata riba agenda pa wordo trata dialuna mainta, pero diabierna atardi nos a ricibi notificacion cu tratamento di e ley aki no ta forma parti mas di e agenda di e reunion publico benidero.”Ta un lastima cu Gobierno a pospone tratamento di e ley aki sosteni tambe door di e partidonan den coalicion.
Miembro di fraccion di AVP den Parlamento, sr. Richard Arends, cu hunto cu su colega Arthur Dowers, a presenta e ley aki pa wordo trata den Parlamento ta decepciona. “E ley aki lo tabata e prome paso pa haci e transicion di un economia convencional pa un economia nobo caminda actividadnan comercial, comunicacion, informacion y servicionan no ta wordo hiba den un forma fisico. E parlamentario ta indica tambe cu den reunion di comision central, tur cuatro fraccion representa den Parlamento a aproba un blanco verslag indicando cu nan no tin e necesidad pa haci preguntanan por escrito. “Desafortunadamente na momento di trata e ley, a opta pa pospone esaki sin duna un motibo,” e parlamentario a sigui splica.
“Nos tin un caminda largo pa cana pa transcuri e roadmap 2017-2020 pa modernisacion di nos sistema di pago manera cu Banco Central a presenta recientemente. Atrasonan asina ta pone mas presion riba e aparato ehecutivo, pero gobierno ta core riesgo di cai atras den henter e proceso aki,” sr Arends a sigui bisa.
Nos ta spera cu e ley aki wordo trata mas lihe posibel, como tambe pa Parlamento ricibi un inventario di e cambionan di ley como tambe introduccion di leynan nobo pa modernisa e sistema di pago local.
