E comision cu ta elabora e propuesta pa un constitucion Cubano nobo, a elimina e articulo cu lo a habri porta pa matrimonio homosexual, despues di hopi oposicion contra e asunto aki durante e debatenan popular encuanto e cambionan pa haci na e Magna Carta, cu a tuma luga durante tres luna.
Den esakinan e topico aki a acapara mas atencion cu tur. Mayoria di e opinionnan recogi tabata negativo pa e cambio di constitucion aki.
“E Comision ta propone cambia e concepto di matrimonio, es decir, pa e sali di e proyecto di constitucion, como forma di respeta tur opinion. Matrimonio ta un institucion social y huridico. Ley lo defini e resto di elemento,” parlamento Cubano a informa riba su cuenta na Twitter.
E propuesta inicial lo a modifica e concepto di matrimonio den e actual constitucion (di 1976), unda ta defini matrimonio como e union entre un homber y un muhe, cu lo a keda substitui pa e texto:“union entre dos persona cu capacidad legal pa esaki,” sin specifica genero.
E cambio constitucional cu a propone a trece un avalancha di discusion na Cuba, cu campaña intenso di parti di e comunidad LGTB, pero tambe di iglesia catolico y evangelista, e ultimo aki cu cada vez mas miembro na e isla. Durante e debatenan popular e tema aki a acapara 66% di e tempo den e reunionnan. A recopila 192.408 opinion al respecto, di cual 158.376 a propone “substitui e propuesta pa esun vigente caba.”
E proyecto di ley nobo lo bay den votacion diabierna venidero den Asamblea Nacional y despues di ta aproba, lo ser someti na un referendum di 24 di februari 2019.
