Ta keda fastioso pa casonan di mucha cu limitacion pero indocumenta

Den un reciente entrevista cu Stichting voor Verstandelijk Gehandicapten Aruba (SVGA), cu Gisela Polo y Els Van Homelen kende ta director, a papia tocante persona of muchanan cu tin limitacion y cu nan papel no ta regla.

Un pregunta cu a haci na e fundacion ta, con ta haci cu muchanan cu limitacion cu no tin un status legal na Aruba. Polo a contesta cu un mucha cu no ta bin den cuido, ta mucha ilegal. E ta bira un situacion dificil, pasobra nan no ta sigura.

Tambe a splica cu e problema ta cu no tin seguro pa cubri cualkier cos cu pasa cu e muchanan. Nan kier pa nan muchanan ricibi un bon cuido medico. E ta bisa cu mayornan ta acerca nan pa bisa cu nan yiu mester cuido medico, sea pa autismo, epilepsia of cualkier tipo di limitacion, anto tin seguro pa cubri esaki.

Sinembargo, un mucha cu no tin status legal no ta sigura, y su situacion ta bira complica. E departamento no kier tuma riesgo cu cualkier complicacion cu por acerca. Un persona cu ta acerca na nan mester mustra cu nan tin seguro, manera AZV cu ta ‘ekivalente na cualkier otro seguro’.

A puntra si por mira ki solucion por trece pa atende cu mucha cu tin algun deficiencia, pero no tin status legal riba nos isla. Polo a bisa cu por bin cu pakete pa e muchanan haya e cuido y enseñanza cu nan merece y tin derecho riba dje. El a bisa cu ora un adulto y yiu ta yega Aruba, nan mester acerca scol prome cu haya un permiso di estadia.

Pero ta keda bisa cu nan mester tin e documento regla prome. “Nan mester tin nan status legal na e pais. A base di esey nos ta pidi e seguro”, Polo a splica. Segun Polo, tabatin caso cu mucha ta bin di afo y nan seguro ta regla y nan por tuma e muchanan aki.

Sinembargo, e ta agrega cu por tin otro scol cu ta tuma mucha indocumenta, pero e diferencia ta cu cerca e fundacion aki tin e aspecto medico. Por ehempel epilepsia mester su remedi, problema di conducta mester di remedi di psychiater, y otro condicionnan tambe tin nan necesidad pa cu atencion medico y remedi.

Polo ta bisa cu no ta bay solamente pa e parti di ilegalidad, pasobra tur mucha tin derecho. Sinembargo, e ta bay mas pa e parti organisatorio. Mayornan ta wak si tin un seguro practico of priva cu por cubri e pakete.

Tin algun mucha cu limitacion cu tin algo specifico of cu tin problema grandi. E ta bisa cu no tur ora por duna un enseñanza cu cliente malo, pasobra nan mester nan tratamento. Nan tin 7 caso cu ta registra cu ta bay Bureau Leerplicht.

Segun e ta splica, cu e departamento no ta busca seguro pa nan, pero nan por tin derecho pa loke ta trata e persona su legalidad y si e no tin seguro. E ta bisa cu na SVGA tin diferente cos cu nan mester, manera logopedista, fisioterapia y otro cos cu por duna na e scol, anto ta ‘e parti aki nos kier trece dilanti’.