Na maart di e aña aki, comunidad di Aruba a keda den shock pa un caso basta fuerte di maltrato y negligencia di bestia e cual a caba cu un resultado fatal, di e caso tristo aki, ta hopi cuestionamento a bin dilanti pa loke ta trata doñonan di mascota responsabel y pa pidi cambionan den ley di bienestar di animal.

Dia 24 di mei 2024 a tuma luga un reunion di Gobierno di Aruba conhuntamente cu diferente stakeholders pa trata e topico tocante e bienestar di animalnan como tambe pa atende e cambionan di maneho, den reunion aki stakeholders a ricibi un presentacion di e maneho nobo denomina Maneho Bienestar di Animal Aruba (MBAA), esaki tin como vision pa mehora e bienestar di animal y crea un Aruba cu ta mas amabel cu nan.

Maneho Bienestar di Animal Aruba, ta e prome maneho cu na banda di prevencion, ta enfoca riba cambio di e relacion entre e ser humano y e animal. Un di e aspectonan di mas importante di e MBAA ta un ley nobo pa proteha e animalnan.

Un otro aspecto importante den e maneho MBAA ta material di les cu recientemente a ser introduci den curiculo di scolnan basico. E material di les aki “Mi ta Responsabel pa mi Mascota” ta sumamente crucial pa educa muchanan pa ta ciudadanonan responsabel cu sa con pa cuida nan mascota adecuadamente.

Tambe, a bira conoci cu dia 1 di augustus, Centers for Disease Control and Prevention (CDC) di Merca a introduci un maneho nobo pa admision di cacho, na unda tur cacho cu ta bay Merca mester ta: Minimo 6 luna bieu, mester tin tur vacuna incluyendo di rabies y tambe mester tin microchip.

Esaki ta nifica cu un cantidad pronostica di 2000 puppies no lo por a bay Merca prome cu nan yega 6 luna di edad despues di 1 augustus ultimo E resultado di esaki ta negativo pa Aruba si no ta actua, mirando cu tin cu bay experiencia un crecemento acelera di e populacion di cacho cu ya caba ta atendiendo cune. Nan a pronostica cu mayoria di esakinan por keda bandona rond di Aruba.

Como parti di esaki, tin un campaña di sterilisacion, castracion y microchipping cu a cuminsa na bario di Madiki na juni ultimo denomina “Paws Uni Aruba” e cual ta trata di 11 fundacion cu a bin hunto cu veterinario y Stimami Sterelisami pa soluciona e problema cu ta existi di cachonan riba caya na diferente districtonan.

Zoey Conijn di Luna Foundation den un entrevista pa Bon Dia Aruba a splica cu e idea no ta bay pa e cantidad si no riba calidad, esaki ta nifica cu nan no ta enfoca riba cuanto bario nan por haci den un corto periodo di tempo, e campaña ta keda den e bario ey te ora cu nan ta sigur cu tur mascota a ser opera y cu nan ta sigur na nan cas.

E fundacionnan ta drenta den e bario, den e casnan pa opera e mascotanan y nan ta drenta pa papia cu e doñonan, educa nan y pa traha casnan di cacho unda mester, zorg pa e cacho ta bon mara y zorg pa e pushinan no ta den sushedad.

Recientemente , riba e grupo di Facebook di Paws Uni a informa cu den 9 dia, 534 cacho y pushi a ser sterilisa y castra.

Awor, Aruba pronto ta bay tin su propio “Dierenwelzijn Wet” unda cu e ley aki por: Proteha animalnan domestico, unda ta garantisa e bienestar di e mascotanan na Aruba. Penalidad y sancion pa abusador: Estableciendo medida stricto pa responsabilisa esnan cu ta comete crueldad of negligencia. Ademas di un structura di posesion di animal: Creando un sistema formal pa posesion di mascota pa garantisa cuido y responsabilidad apropia.

E ley ta consisti di varios componentenan clave pa aborda bienestar di animal den un structura legal:

1. Registracion obligatorio via microchip: Tur mascota lo mester ta registra cu un microchip.

2. Sterilisacion obligatorio: Doñonan lo tin cu sterilisa nan mascota.

3. Reglamento pa Criadornan (Breeders): Criadornan lo mester registra y cumpli cu standarnan stricto.

4. Responsabilidad di Cuido di Animal: Reglamento nobo lo stipula cuido apropia y aclaracion di responsabilidad di doño di mascota.

Aplicacion di e ley lo tuma luga den dos nivel:

• Handhaving Administrativo: Ministerio di Naturalesa lo ta encarga di sistema di registracion y monitorisacion di cumplimento cu e ley pa garantisa bienestar di animal. Inspectornan den e ministerio lo keda ekipa pa enforsa e ley, tareanan cu anteriormente tabata bou di KPA (Cuerpo Policial di Aruba).

• Handhaving Penal: Den casonan severo di abuso, crueldad y negligencia grave di animal, e proceso hudicial lo keda bou mando di KPA y OM (Ministerio Publico). Lo aplica e Strafrechtelijk Handhaving unda e Ministerio ta bay traha di cerca cu autoridadnan pa garantisa cu esnan cu comete infraccion lo rindi cuenta na husticia rapidamente.

E propuesta di ley mester a drenta den fase di consulta publico riba e website www.publico.aw dia 2 di september ultimo, pero debi na reunnionan cu mester a tuma luga cu diferente stakeholders, nan a anuncia un fecha nobo cu ta bira 18 di september unda comunidad lo por duna sugerencia y/of comentario via un formulario online.

Ademas, ta bay tin dos consulta publico cu lo tuma luga na MFA Savaneta dia 4 di september for di 6:00 PM te cu 7:00 PM y MFA Paradera dia 26 di september for di 6:00 PM te cu 7:00 PM, unda miembronan di comunidad por yega personalmente pa ricibi informacion y duna nan input.

Lamentablemente comunidad a experiencia di cerca diferente caso di abuso di animal extremo, como por ehemplo e caso di Khaleesi unda hasta turistanan a bin Aruba pa participa den e Walk of Light organisa pa diferente fundacion y asina mustra un rechaso na e actonan aki, ademas tambe tabatin otro caso cu no a bira mucho conoci di e cacho “Snowy” un Huski blanco cu a muri na Kurimiauw, di e cual Bon Dia Aruba a skirbi un relato di dje y a puntra autoridadnan sin cu por a haya contesta.

Pa e motibonan aki, ta importante pa comunidad keda envolvi den loke ta trata e consulta publico di proyecto di ley di Bienestar Animal y asina evita mas casonan tristo di maltrato y negligencia unda e mascotanan ta esun cu mas ta sufri.

Un di e potretnan ta cortesia di Paws Uni su Facebook page.