ORANJESTAD – Bon Dia Aruba a papia cu sr. Maximo Werleman, kende tin un cunucu di pinda y varios otro producto pa asina come organico. Na Aruba, un tendencia ta mirando algun persona tin nan cunucu cu nan producto pa come saludabel.

E idea di pinda a bin, segun Werleman, di nan mayornan kende pa hopi tempo tabata haci nan mesun plantacion di berdura, bonchi y algun fruta. “Mi hendenan a haci maishi, bonchi y despues a cuminsa cu pinda.”

Segun Werleman, e cunucu tabata di su mayornan, despues a pas’e p’e. Den tempo di antes e ta bisa cu hende tabata dura mas largo. E ta agrega cu esey ta motibo di cuminda saludabel cu nan mes tabata planta y come, no manera awendia, cu hende ta come riba caya cuminda procesa.

E ta remarca cu e tin varios aña ta cultivando cuminda, agregando cu por tin aña e ta bay bon, pero no tur ora. E ta splica cu e ta depende di awa, y actualmente e cambio di luga di dam ta bon. E ta bisa cu tin luga unda awa ta contamina.

Sinembargo, e ta splica pa haya e awa pa e proceso di pinda ta uno duro. E ta splica cu e tin tanki unda ta cumpra awa, pero e proceso di pinda ta pidi ‘hopi awa’. Pa locual ta trata e temperatura di Aruba ta bon, pero e problema por resulta pa motibo di bichi. “E tin su peliger, bichinan ta pasa riba e pinda anto mester cuida esaki. Tin cu keda pendiente, paso e por tin su cosnan fastioso. “

E pinda tin cu keda 3 luna bou di tera, saca e pinda pa asina bolter nan bek pa uza nan. “Awendia pa motibo di falta di awa, ta ranca nan y hopi ta bay perdi pa motibo cu nan ta chikito. No tur ta sali hunto.”

Den e proceso, Werleman ta splica cu pinda ta fastioso pa motibo cu tin cu traha hopi cune. E no gusta laga su pinda cu yerbanan den dje, mayoria di biaha e ta keda dedica tempo, pa keda bon limpi.

E producto di tera ta miho, e ta mas saludabel, producto di afo riba barco tin basta tempo den freezer. “Producto local ta consehabel pa come, jambo, boonchi, tur esey, concomber ta saludabel. E awa mes ta yobe, y hende ta haya bonchi, concomber, e ta saludabel pa come.”

E tin su hendenan local cu ta aprecia su pinda y ta cumpra for di dje. E ta importante pa hende cumpra local. “E ta algo pa hende mes produci, anto e ta special. Si e ta miho pa bo mes.”

Werleman a splica cu pinda ta bon pa salud y tin su cosnan positivo. Pero p’e, ta mas un dushi hobby, pero e mester haci e cu dedicacion y amor.