Recientemente un suceso lamentable a tuma luga na unda un famia perde nan vivienda pa motibo cu un parti di e dak di nan cas a cay den otro y a perde un gran cantidad di nan pertenencianan. Aworaki e famia ta haci un yamada na comunidad pa pone man na curason y yuda nan den nan momento di necesidad.
Na momento cu e famia a yega cas, nan bida a cambia por completo ora cu nan a wak con un parti di e dak di nan hogar a cay den otro y asina a perde un gran parti di nan cosnan. Un caso lamentable y cu aworaki varios ciudadanonan riba rednan social ta haci yamada na henter pueblo di Aruba pa di un forma of otro yuda e famia den e momentonan dificil aki.
Comunidad por yuda den diferente forma, por entre otro haci donacion di material manera cement, bloki, palo, playwood, sheetrock, clabo, santo, cualkier material cu por yuda cu reconstruccion di e cas.
Ademas di esaki, por yuda tambe cu articulonan di hogar manera television, airco, muebles, stoof, frigidaire, cama, cashi di paña, cosnan di cushina manera tayo, beker, cuminda, entre otro.
E famia ta consisti di un mama y tres yiu muhe, edadnan 2, 3 y 9. Comunidad por haci donacion tambe di paña y sapato pa hende muhe adulto, mucha muhe (edadnan menciona) y cosnan pa baby tambe. Ayudo financiero tambe ta bon bini.
Polis y brandweer a presenta na e sitio. Bomberonan mesora a desconecta e boternan di gas pa evita cualkier otro accidente y a pidi pa ningun hende drenta e cas pa motibo cu nan no ta sigur di e stabilidad di e resto di e cas y no sa si e resto di e dak tambe lo cay den otro. Personal di Elmar tambe a presenta na e cas y a corta coriente.
