Diahuebs anochi, Minister di Enseñansa Endy Croes a atende GED Graduation di International School of Aruba. Coordinado Sra. Dalmarie Anderson a duna bonbini na tur esnan presente.
A inicia e atardi ameno cu e himno di Aruba canta pa Sr. Edjean Semeleer, sigui pa e un discurso di director di International School of Aruba Sr. Dennis Willeford. Durante e ceremonia Minister di Enseñansa Endy Croes a duna un discurso felicitando e graduadonan y a haci entrega di diploma na e 10 graduadonan presente.
Mayoria estado di Merca y provincia di Canada ta ofrece General Education Development (GED), cual ta un alternativa pa e adultonan cu no por a finalisa scol secundario di e forma tradicional. Tambe, por ofrece hoben bou di 16 y 17 aña bou di cierto circunstancia. GED a desaroya originalmente na 1942 como un alternativa util y viabel pa e militarnan cu a wordo manda den exterior pa lucha den guera prome cu nan a finalisa scol secundario. Desde e tempo ey, mas di 18 miyon persona a pasa a test durante nan 70 aña di existencia.
Desde aña 2017, International School of Aruba hunto cu Ministerio di Enseñansa di Aruba a inicia e programa GED cu exito, unda cu ta ofrece esnan cu no a termina scol secundario e alternativa pa finalis’e y haya un diploma. Minister Endy Croes ta indica cu e test aki ta habri porta pa e studiantenan aki por sigui cu un estudio na un Junior College y/of College na Merca of Canada pa sigui desaroya nan mes.
Pa finalisa, e mandatario di Enseñansa a felicita tur e graduadonan cu tabata presente y tambe esunnan cu no por a asisti e anochi aki cu nan logro. Hopi exito den futuro!
