Ta existi un sorto di canibalismo cultural nobo…

En conexion cu 18 di Maart, Academia di Bellas Arte Aruba Ateliers ’89 a participa den e celebracion di 30 aña di Status Aparte y 40 aña di nos Himno y Bandera. Nan a organisa e apertura di nan exposicion colectivo bou e nomber basta subhetivo:“Cultuur Kannibalisme”.

E artista y curator, Elvis Lopez kende ta director di Ateliers ‘89 ta splica cu tur “hende ta canibal di cultura” caminda “un cultura ta absorbe otro, y un arte ta absorbe otro”. E ta haya cu esaki ta un sorto di canibalismo nobo rond di cultura.

E exposicion colectivo aki ta di tur alumno cu a participa durante nan prome tayer di 2016. Nan ta 12 obra cu ta expresa e canibalismo cultural di mundo. E tema aki ta liber di interpretacion di e artista y tambe di e publico. Algun di nan ta obranan abstracto y tin cosnan figurativo. Nan ta varios  instalacion y e conhunto di nan ta haci un obra, segun e artista Elvis Lopez.

Mas motivacion

E artista, director y curator di fundacion Ateliers ’89 Academia di Bellas Arte Aruba, sr. Elvis Lopez ta haya cu cada bes ta birando mas dificil pa keda motiva e hobennan riba tereno di arte. Apesar di esaki, e fundacion aki ta sigui cu su tarea constante di organisa tayer cu persona conocedo di arte plastico. Di e forma aki nan ta prepara e hobennan cu ta bay studia den un academia di arte.

“Nos ta esun miho den e 10 añanan di experiencia cu nos tin”, el a declara na Bon Dia Aruba. Cu hopi satisfaccion y orguyo e ta señala cu Ateliers ’89 ta e unico cu a manda un studiante cu a wordo acepta na Hulanda e aña aki. “Mientras cu bo tin e otro academianan cu no ta exitoso den e sentido ey”, segun e director di Ateliers ’89.

Sr. Lopez a bisa cu Ateliers ’89  ta keda produci candidatonan  clave den mundo di arte cu nan ta sigur di nan cu e hobennan aki por haci carera di nan talento artistico mañan. El a indica cu nan ta hopi stricto pa kies un mucha den nan academia y si nan por wak cu e no por sigui.

“Nos no ta bay gaña y cobra su persona 1.400 florin pa aña. Nos ta gewoon trata y educa e muchanan segun nan merito ta. Bo no ta pusha un hende, nos  ta trata di traha un hende akinan”, el a bisa. Di e forma aki nan ta purba di guia nan participantenan manera nan por.