Den cuadro cu caso di locutor y DJ popular Oz Jansen acusa pa tene relacion sexual cu menor di edad, fiscal a pidi un castigo di 18 luna di cual 6 lo ta condicional.  E veredicto lo ta conoci riba 30 di maart.

Segun Ministerio Publico, Oz Jansen ta bisa di no tabata sa cu e mucha tabata menor di edad pero cu pa ley y hurisprudencia realmente esaki no ta importa. Vocero di OM ta bisa: “Cerca polis el a declara cada bes algo totalmente otro tocante e aspecto aki, asina ta cu fiscal a sali di declaracion di e mucha cu el a bis’e prome cu nan a tene relacion sexual. Cu e sex tabata vrijwillig tampoco ta haci ningun diferencia. Sex cu un mucha ta castigabel con cu bo kier bire.”

Haltura di castigonan
Ministerio Publico ta na altura cu tin hopi discusion na Aruba tocante e haltura di e castigonan relaciona cu abuso y maltrato. “Tin biaha publico ta bisa cu bo mester benta yabi afo y cosnan asina, anto otro biaha publico kier pa e hende sali liber mesora. Pa ley sin embargo tur hende ta pareu.”  Esaki ta conta negativamente pa e sospechoso aki y pues a pisa riba e castigo cu fiscal a exigi pa e ta. Cu e tabata sa, of mester tabata sa cu e victima tabata tin 14 aña, cu el a tene relacion sexual cune sin uza proteccion, cu ora e victima a sali na estado, el a lag’e cay y a bisa e mucha di 14 aña aki cu e no ta tuma responsabilidad pa esey. Ministerio Publico a haci un corto remarke tambe cu tabata tin hopi publico presente den corte diahuebs mainta pa trata e caso aki, cu na final a aplaudi pa e sospechoso.

Caso Oz
Den caso di Oz, ta nifica cu e no lo tin cu sinta e 6 luna nan condicional. E ta haya un periodo di prueba di dos aña.  Si e no comete ningun acto castigabel mas,  e 6 lunanan ta cay afo. En todo caso,  si hues bay di acuerdo cu fiscal, e tin cu bay sinta 12 luna, pero e ta haya un rebaho di un tercera parti si e comporta su mes. E ora ta 8 luna e mester sinta kitando e 3 cu el a sinta caba, lo ta 5 luna mas pa bay. Esaki ta informacion cu Abogado Chris Lejuez den defensa di Oz Jansen, ta comparti cu Bon Dia Aruba.

Oz ta wordo acusa di a tene relacion cu un persona femenino menor di edad  entre 12 cu 16 aña tempo cu nan a tene relacion.  Oz a admiti cu berdaderamente el a tene relacion cu e mucha muhe kende el a asumi cu tabata tin un edad di mas cu 16 aña.  “El a topa cune laat den anochi den un bar na San Nicolas  unda cu e tabata trahando como DJ. Eynan nan a cuminsa basila otro, mas despues el a sali cunele, el a bay un apartamento y nan a drumi cu otro e dia ey.” Sr. Lejuez ta bisa

Segun Oz, despues di esey el a haya sa cu e mucha tabata tin 14 aña. Aunke el a keda den contact cune, nunca mas e tabata tin relacion sexual cunele. “Naturalmente fiscal a bisa cu e ta haya toch cu e forma con e cos a bay ta exigi un castigo penal. Y defensa a trece pa dilanti e punto na fabor di Oz cu bo no por spera un persona di 14 aña canando den e oranan laat di anochi den un night club. Mas ainda cu su mayornan tabata presente sin duna ningun indicacion di esey,” sr. Lejuez ta splica. Ademas di esey,  e abogado ta bisa cu ta prome biaha cu Oz ta haya problema cu husticia pues e ta un ‘first offender’ cual por traha na su fabor. A wordo treci pa dilanti den corte tambe cu e tambe tin famia y yiunan pa cria, y cu el a haci un bon trabou pa hubentud den transcurso di aña den forma di lecturanan na scolnan.

Reaccion di Oz
Segun e abogado, na final Oz a bisa hues cu e kier extende disculpa na e mucha muhe (hunto cu su mayornan). E kier extende palabra tambe na su mesun famia cu e ta duel e cu el a haci nan dolor pasobra awor e ta cera.