Servicio medico ilegal (3).JPG
– Departamento di Inspeccion ta splica Bon Dia Aruba cu e ta hopi dificil pa nan tin un control pero cu nan ta hopi consciente riba e fenomeno di servicionan medico ilegal andando riba nos Isla.
Manera cu nos matutino a publica algun siman atras, minister di Salud Publico Alex Schwengle ta bisa cu pa 2017 ta bay tin cambionan grandi. Nan ta pensa cu den menos di un aña nan lo tin suficiente hende pa investiga e asunto di servicionan medico ilegal. 
Departamento di Inspeccion tambe ta para tras di e punto aki mirando cu asina ki bo ta pone un stop mas lihe na e practicanan peligroso aki. Sinembargo awor ta bisa cu no ta facil pa haci e control y ta depende tambe di e ayudo cu nan ta haya for di publico. 
Hurista Leslie Escobar di Departamento di Asunto Huridico di Inspeccion ta bisa  Bon Dia Aruba cu: “Nos ta consciente cu e fenomeno aki ta pasando anto pa cu esaki ta dificil pa bisa cu bo tin un control. Nos ta compronde cu tin biaha tin dokternan cu por ehempel ta bin keda pa un fin di siman of ta bin haci cierto consultanan anto bay bek nan luga. Pa nos por caba cu e fenomeno aki den un bon manera, nos mester e ayudo di e comunidad . Si boso ta wak cu e cosnan aki ta pasando, meld esaki cerca nos anto e ora ey nos ta tuma e pasonan necesario pa trata cu esey.” 
Sancion
Banda di e parti di inspeccion, duna conseho na minister y atende cu kehonan di pashent, e departamento ta mantene e registro di e profesionalnan medico y paramedico na Aruba. Locual ta pasa por ehempel den mundo di cosmetica, nan ta haci tratamento cu conforme ley ta wordo interpreta como ‘medische handeling.’ Ora cu bo bay over na un inyeccion of corta den un hende su curpa pa haci cierto tratamento, bo ta pasando e limite di cu locual abo como ‘schoonheid specialist’ lo por haci anto drentando den un tereno cu ta mas medico. Asina Sra. Escobar ta splica.
 
Dokternan mes tambe ta meld ora nan ta haya sa cu tin cierto dokternan di afo ta bin Aruba pa haci cierto trabou. Segun Sra. Escobar, tin sancionnan cual por ta riba nivel penal of boet cu bo ta haya. Pero en todo caso, asina cu nan haya sa di un caso specifico nan ta tuma accion di biaha anto bay na e luga pa constata prome si e melding ta berdad. “Ta papia cu e persona en cuestion anto ta inform’e cu e no por sigui haci locual cu e ta haciendo.”
 
Sra. Escobar ta comenta cu: “E ley ta stipula cu e profesionalnan medico, pues tur e dokternan, mester ta registra cerca nos. Tin un procedura cu nan tin cu cumpli cu ne na Aruba anto internacionalmente e ta asina tambe cu tur luga cu bo bay, un dokter no por yega traha sin cu e ta registra na e instancia of autoridad competente di e pais cual na Aruba anos ta encarga di esaki.” E ta bisa cu si un dokter di cualkier parti di mundo kier bin traha na Aruba,  nan tin cu manda un peticion cerca nan hunto cu tur nan documentonan anto a base di esey, departamento di inspeccion ta controla si e persona aki por traha na Aruba of no anto duna autorisacion pa esaki.