Medidanan pa Covid-19 t’ey back pa un siman mas na unda cu Departamento di Salud Publico pa via di e situacion cu Aruba ta bibando na e momentonan aki a señala cu nan ta solicita data tur dia pa asina mira con esey ta bayendo y ki tipo di medidanan tin cu tuma pa esey.

“Data tin cu wordo transforma den un maneho y e maneho ey tin cu wordo traha, Crisis Team tin cu acord’e y mand’e pa pueblo pa nos sa kico ta going on, pa sa kico nos tin cu haci cu e data” Sharline Koolman di Departamento di Salud Publico a anuncia.

Di loke ta trata e situacion cu Hospital Dr. Horacio Oduber tin na e momentonan aki ta algo cu nan a premira caba “nos a bisa cu si nos ta keda cu e actitud akinan nos ta bay wak esaki transforma back den hospital” algo cu ta sosodiendo y cu casonan admiti pa hospital por bira mas grave.

Manera ta keda conoci, aumento di casonan positivo pa Covid-19 a aumenta den ultimo luna na nivel mundial y Aruba no ta un excepcion, el a expresa cu tabatin algun fayo den e data algun dianan pasa cu a causa un polemica den comunidad, loke ta preocupa ta cu ora hospital cu si tin por ehemplo, 12 cama di ICU y 10 pashent hospitalisa, un caso mas of un caso menos ta dramatico pa nan.

Asina mes, Koolman a menciona cu dokternan di cas tambe a cuminsa bisa cu e avond dienst tabata mas pisa y den un anochi so nan tabata haya 40 yamada “nan tambe a bisa nos cu e cos aki ta bay scala” ta p’esey cu den conferencia di prensa nan a haci e peticion pa comunidad wak con nan por atende nan fiestanan y bida nocturno cu Aruba tin, “pero nos no a duna oido na nada di esey y aworaki nos ta mira lo cual ta pasando na hospital”, el a bisa.

Di mesun manera, Koolman a agrega cu tur e situacion aki ta pa via di e mesun comportacion di comunidad, el a indica cu pa Departamento di Salud Publico esaki ta un subida drastico di casonan na unda el a informa cu riba un dia tin 200 hende pa haci e investigacion di contacto y banda di dje tin 200 hende mas cu ta yama pa haya sa si nan ta keda den isolacion, ademas di yama tur esunnan cu ta den cuarentena cu no ta vacuna y esunnan cu ta vacuna si ta berdad cu nan ta vacuna pa saca nan for di cuarentena.

El a trece dilanti cu constantemente nan ta haya critica riba social media pero cu comunidad mester “pone un spiel bo dilanti y wak si ta abo ta parti di e crisis aki” pa motibo cu nan sa kico nan ta haciendo y pakico nan ta haciel’e y e pregunta ta pa esunnan cu ta biba na Aruba ta consciente di esey pa wak con por coopera y kico por haci.

Di e medidanan cu a wordo implementa un biaha mas Koolman a indica cu nan sa ki impacto esey tin riba full e pais pero cu hopi hende ainda no ta consciente di esey y cu comportacion lo keda conta pa e siguiente simannan cu ta bin, pa fin di september ainda por tin casonan positivo subiendo tanten cu personanan no lo ta completamente vacuna y protegi.

Algo cu ta wordo ripiti pa hopi biaha ta cu ora un persona ta vacuna no ta asina cu no por haya e virus, e ta depende di por ehemplo, di e condicion di e persona cu por tin e malesa di cancer cu a vacuna completo y cu ta hayando tratamento di cancer y esey ta baha su defensa, loke ta nifica cu e persona aki por haya Covid-19, bira malo y por drenta na hospital pero e chens pa muri lo ta mas chikito.

“E ta tristo pa mira con hendenan ta yegando hospital den un situacion caminda nan ta fayece”, esaki por ta pa motibo cu e pulmonnan a wordo afecta hopi drastico pero tambe por ta debi cu cuido no a bin na tempo, tin biaha cu e ta cuminsa cu un simple nanishi ta core of un tiki tosamento y di un ora pa otro esey ta scala, na e momento cu esey sucede tin cu purba den oranan di dia pa acerca dokter di cas.

El a menciona tambe cu parti di alcohol ta un punto cu comunidad mester tin mas responsabilidad riba esaki y cu hospital a pidi pa por fabor yuda den e parti aki.

“Gobierno no por keda baby sit nos mas, e ta bo mesun responsabilidad, nos tin mas di un aña den e situacion aki, Delta ta un pero lo tin mas variante y esey nos tur sa”, Koolman a indica.

Tambe a keda conoci cu e medidanan implementa lo keda te dia 1 di september na unda el a bisa cu nan lo purba di kita nan back “no tur pero probablemente cuminsa los algun di nan pa wak con e casonan ta sigui y tur cos lo depende di e casonan cu lo sali e siman aki” el a sigura.