(NTN24) – Concehal di ciudad di Bucaramanga na Colombia, Jaime Andres Beltran, a denuncia un modalidad nobo cu delincuentenan ta uzando pa comete nan actonan y scapa di husticia.
“Nos a descubri un modalidad nobo cu delincuentenan ta usa na Bucaramanga pa scapa di husticia Colombiano. P’esey nan ta hari na momento cu nan ta captura,” e concehal a sigura riba su cuenta di Twitter.
El a firma cu di acuerdo cu varios investigacion, e delincuentenan ta cumprando a traves di rednan social cedula falso Venezolano cu e proposito di stroba e proceso di hudicialisacion.
“E investigacion aki ta e punto di partida pa enfrenta criminalidad cu mas forsa na Bucaramanga. Mi deber ta denuncia pa cu autoridadnan y sistema hudicial por procede. E delincuencia ta renoba dia pa dia, ta p’esey nos mester ta un paso dilanti,” el a destaca.
E concehal a señala cu nan ta haya e cedulanan falso a traves di rednan social pa 150.000 peso, motibo pa e cual el a haci un denuncia na Fiscalia General di Nacion pa solicita na e personanan aki nan proceso hudicial pa benta di documentonan publico falso.
“E burla aki ta indignante, pasobra nan no ta haci’e cu husticia so, tambe nan ta haci’e cu nos. Ta indignante wak e criminalnan burla y hari despues di nan captura,” e concehal a bisa.
Asina mes, a indica cu e modo di falsificacion di identidad no ta sosodiendo solamente na nivel Colombiano sino tambe na otro paisnan di continente.
“For di momento di publicacion di un denuncia di papelnan of documentonan falso Venezolano, nos a haya denuncia di otro paisnan como Peru y Chile,” el a sigura.
Ademas, a conta cu “Bucaramanga ta e ciudad fronteriso cu tin paso migratorio constante, no solamente nos ta enfrenta un crisis migratorio sino tambe e delincuencia.”
