Que vaina. Un otro ‘sorpresa’ den e aventura di burocracia cu ta mi bida na Aruba. Despues di a cuminsa aña determina cu tanto resolucionnan pa aña nobo, casi inmediatamente tur mi deseonan a perde nan colo ora mi  wordo confronta un bes mas pa empleadonan publico cu mal actitud y cla pa bisa mi cu mi no por aplica pa nacionalidad Hulandes. Pero podise esaki ta un blessing in disguise.

Despues di lucha tanto cu burocracia e ultimo aña(nan!). Ma sinta un bes mas despues di un aña cu un abogado pa por puzzel ta con lo mi bay cana caminda pa obtene mi nacionalidad Hulandes. E permiso pa estadia indefini cu Dimas a otorga na 583 persona (segun cifra di cuminsamento di october) sigur lo a cambia situacion di hopi persona, esaki mi ta comprende completamente. Ami mes ta un di nan cu e a sa di beneficia.

Sinembargo semper mi tabatin poco inkietud rond di e permiso aki. Pues e sospecho aki a keda confirma despues cu awe bon noticia a cay di parti di e abogado cu mi a sinta cu ne. El a bisa mi cu pasobra mi tin un firma liber, e periodo di permiso sin buraco rekeri pa aplica por wordo baha na 3 aña cu permiso sin interupcion pa por aplica pa e nacionalidad. Esaki compara cu e 5 aña cu normalmente un persona lo mester tin sin buraco pa bin na remarke pe nacionalidad.

Mas cu claro, mi no ta confia solamente un fuente, pues mi a dicidi di confirma e informacion aki na e Gabinete di Gobernador. Na yegada na e loket mi a haya mi mes confronta cu un trahado cu a informa mi cu loke e abogado a bisa mi no ta corecto. Segun e empleado publico, e firma liber cu mi tin ‘no ta un firma liber berdadero’. Mensen, mi tin di bisa cu mi tabata babuca. Asina e señora a sigui bisa cu ‘esaki tabata un acuerdo entre gobierno Hulandes y gobierno di Aruba. Pero e tabata pa e personanan specifico cu tabatin dificultad den pasado’.

Pues e señora a conclui cu mi no lo por gosa di e verkorte termijn cu normalmente ta conta pa esunnan cu a yega na nan firma liber di manera legitimo. Que escandalo. Tur esaki mientras mi ta corda cu aña pasa mi mester a comproba na Dimas (e autoridad riba stranheronan na Aruba) por medio di declaracionnan di scol y otro documentonan manera administracion di Censo cu mi tabata na Aruba pa un termino di 10 aña, di cual 5 minimo lo mester a ta na un scol.

Mi ta puntra mi mes, dicon tanto fanfaria rond di e aspecto aki di e aplicacion pa e permiso di dreamers si en fin Dimas no ta reconoce cu mi no tin buraco den mi estadia legal? Kico Dimas of gobernador ta gana por medio di tene tur e dreamers wanta den cashi? Pasobra eventualmente despues di 5 aña (maximo) tur e dreamers lo por bira Hulandes toch.

Esaki ta mi pregunta central, pasobra den mi concepto hopi di e personanan cu a haya e permiso aki lo kier studia afo. Y pa un persona di nacionalidad Venezolano manera mi mes, no ta exactamente e miho momento pa haci esaki. Pero apart di mi situacion personal, e pregunta mas den cuadro legal ta con e ta asina cu gobierno Hulandes awo por dicta kico pa nan ta di considera un vergunning tot verblijf legitimo y cua no ta legitimo? Mi lo purba sinta cu e representantenan di seccion consular di Gabinete di Gobernador pa asina clarifica e puntonan aki y lo trece e resultadonan di e entrevista den un proximo edicion di Bon Dia Aruba.

Decolonisa bo mes

E holo di colonialismo ta masha sterki rond di e topico aki. Pero e ta masha interesante con henter e burocracia aki a drenta mi cerebro manera un gas venenoso y min ta haya manera pa sak’e. E manera pa saca e fucu aki ta por medio di pensa mas leu cu burocracia.

Kico ta mi balor? Kico ta nos balor? Si Aruba kier wanta e potencial di su hobennan un banda, laga nan. Ken ta Arubiano? Ta Arubiano ta algo pa balora? Si mi mira con tantisimo persona ta obtene nan derechonan Hulandes por medio di habri pia aki aya, paga un suma halto aki aya, mi tin di ta orguyoso cu mi a keda Venezolano te awo. Den un combersacion cu un persona cu ta studiando afo mi a haya mi mes confronta cu e mesun pregunta cu mi tabata haci mi mes un aña pasa: dicon mi ta asina enfoca riba studia na Hulanda?

Si mi kier cambia e manera cu mi ta pensa, mi tin di desvia di tur cos cu nos tin en comun como studiante Arubano. Loke e studiante den exterior a menciona, ta, cu den un lectura su docente di filosofia a splica con e suheto post colonial, naci den Caribe, ta sentencia pa emigra bay su madre patria pa studia unda e pais lo sa di colonisa su mente cu ideologia burgues.

Decolonize yourself!, e docente a sclama na un klas cu ta consisti casi completamente di Hulandes Europeo. Claro e parti comico di esaki bo no tin cu laga atras, pero e tin su profundidad. Y ta casi simbolico cu ni mucho ora prome cu mi a tende di esaki, e trahado di e gabinete a puntra mi pa mi aplicacion pa visa Schengen si mi kier e formulario den Spaño, Ingles of Hulandes.

Ma bis’e casi rabia cu mi ta papia tur 3 lenguahe, pues no ta importa cua. E señora cu bril a duna mi e formularionan den Spaño.

Aruba, si bo no kier mi, mi sa cu mi ta hopi mas valioso cu bo.