MERCA – E autoridadnan di California a bisa cu a confisca un record di 1.9 tonelada di metanfetamina, pa un balor di mas o menos $1.3 biyon, hunto cu heroina y cocaina cu destinacion pa Australia.
E confiscacion tabata consecuencia di un operacion realisa pa funcionarionan di e frontera di Merca y e polis di Australia. El a tuma luga dia 11 di januari ultimo, na e puerto di Los Anegeles, Long Beach asina e autoridadnan a bisa. E droga tabata artisticamente scondi den un cargamento di speaker.
Cuater polis di Australia y dos di Merca a wordo aresta diaranson pa e polis federal di Australia, pa motibo cu ta bou sospecha di ta involucra den e traficacion di droga, asina autoridadnan a bisa. “No tin duda cu organisacion criminal a ricibi un golpi duro”, segun comunicado di Jospeh Macias, kende ta agente special di investigacion di siguridad nacional di Los Angeles.
Dos container di droga tabata scondi den caha di metal cu sticker di ‘single loud speakers’. Tabata contene 3,810 libra (1,730 kg) di metanfetamina, 56 libra (25 kg) de cocaina y 11.5 (5.3 kg) libra di heroina, asina e trahadonan di proteccion di aduana y frontera di Merca a bisa.
Ta e mayor confiscacion di metanfetamina di Merca. Si e lo a yega Australia, e lo a costa un $1.3 biyon. “Tin hende den problema grandi, nos tin suertecu autoridad di Merca y nos por a stop prome cu a yega su destinacion”, e autoridadnan a bisa den un comunicado.
