‘Ta con bo kier progresa si bo no ta stop y reflexiona?’

Mi hendenan con cos ta? Aki banda ta bay di friu, pa mas friu, pa mas friu. E winter ki ta parce eterno. Aki aya mi a wak poco di nos localnan ta keha di awa friu mainta. Boso tur stop di ta chichi! Ami mester bay scol den temperatura -4. Pero bon! Ban papia! “Spring break” a lora aki banda y mi ta lamenta cu mi no ta Beyonce ainda, paso sino lo mi a bin Aruba chill pa 10 dia gewoon. E luga ki di berdad no ta pa mi mensen.

Pero bon, ban catch up cu trabao di scol miho y enfoca ya cu e finish line ta eynan mes. Actualmente mi tin un meneer cu ta obsesiona cu reflexion, pa cada un cos chikito cu nos haci e kier nos skirbi un reflexion.

Den e prome dos añanan di scol nos a haci nan hopi. Mas tanto, esaki tabata pa evalua con e trabao den ekipo a bay. Awo cu mi ta den e tercer aña, mi ta haya skirbi reflexion constantemente un perdida di tempo y si ta pa mi, mi ta entrega e proyecto y ya. Claro cu esaki no ta un actitud corecto pa tin, pero comprende pa mi. I am tired. E meneer ta argumenta cu e problema di hende awendia ta simplemente cu nan no ta stop pa reflexiona.

E ta bisa cu como hende nos ta gusta hisa benta, sin para pensa con nos lo por haci cosnan miho e proximo biaha. Hopi hende no ta progresa pasobra nan no ta reflexiona, pues nan ta keda haci e mesun foutnan sperando diferente resultado. Esaki ta conta pa tur aspecto di bida, sea ta trabao, relacionnan personal, amor, etc. Den e fast life cu nos ta hiba awendia, tur nos pensamentonan ta tuma un backseat y hopi accion ta bin prome cu pensamento. Ainda mi no kier haci reflexion despues di cada proyecto, mi hendenan. Pero mester duna e meneer su rason si.

Awo mas cu ta cuaresma, cu hopi hende ta tuma un challenge aki aya pa 40 dia. Mi tambe ta comparti su opinion. Mi ta un escritora, cual ta rekeri pensa hopi, pero pensa cu reflexiona no ta sinonimo. Podise e parti mas duro di reflexion ta cu hopi biaha bo lo mester enfrenta bo propio berdad y bo propio fayonan, cual no semper ta algo facil. Punta dede, culpa un otro, bisa cu nos no ta den control di e situacion ta un easy way out. Mi no ta un psicologo di ningun sorto, pero si mi tin cu admiti cu hopi biaha mi por a haci mi bida menos complica si mi lo a stop y reflexiona un rato. Mi ta kere esey ta tur pa e siman aki tambe mi hendenan.

Ta cuaresma, pues un tiki respet, no ta ora pa bomboshi. Ta locooooooooooo, manera Clarita ta bisa. Mi a bisa esaki den pasado, mi ta bolbe bisa esaki atrobe. Tin ora e respuesta ta paden di nos mes, pero nos ta asina ocupa cu bida cu nos no tin tempo pa busca esaki. Kico a bay fout pa bo recientemente? Of miho ainda, kico a bay bon? Kico a causa e exito aki? Bo ta pensa ripiti e mesun stapnan?