Desde cu a introduci parkeermeters den centro di ciudad, por mira cu tin auto cu ta haya klem pa diferente infraccion relaciona cu parkeer. E klemnan aki ta trece un bista negativo cu nan, por lo tanto Aruparking ta buscando un solucion pa esaki. Di oficina di gobierno a ricibi e siguiente relato relaciona cu esaki.
Un di e puntonan cu Minister President Mike Eman a trece dilanti durante e conferencia di prensa ofreci hunto cu Aruparking, ta esun di klem. Gobierno tin comprension y atencion total pa sentimento di publico den e asunto aki. “Klem a bira e visualisacion negativo di henter e parking,” asina mes, Premier Eman a añadi cu no mester lubida cu “tur caminda cu tin un regulacion, mester tin tambe un sancion, si no e no ta funciona.” Paga pa parkeer ta un concepto internacional, pero asina mes, na Aruba su introduccion a hay’e afecta.
Un comision di Aruparking y Arubus a bay New York pa reuni cu autoridad di parkeer di e ciudad grandi aki pa wak con nan ta atende e aspecto aki di nan servicio. Ey a conoce cu nan tambe a y ta pasando den un proceso di test diferente maneho. Na New York a kita klem pa na su luga pone boet, despues cobramento di boet a bay dificil y awo nan ta haciendo un combinacion di klem y boet.
“Nos deseo ta keda pa elimina e klem completo, pero esey no kier men cu no lo tin sancion,” asina Minister President Mike Eman a declara durante e conferencia cu a tuma luga den sala di reunion di edificio Gobierno. E mandatario a indica cu su Ministerio hunto cu Aruparking y Arubus ta keda traha riba e punto aki. “Ta pensando riba diferente posibilidad, mester wak tambe nan funcionalidad,” asina Premier Eman a indica.
