Ta bira tempo pa re-inventa Y sigui planifica futuro

‘No hay mal que por bien no venga’. Un expresion cu nos tur conoce, y perfectamente aplicabel riba e situacion cu a surgi na waf di Barcadera, causa pa e contaminacion di aire cu e huma di WEB ta produci.

Na prome luga e ta haci cu nos mester cuminsa contempla e tipo di contaminacion aki, cu ta afecta otro actividad economico importante, y ta hinca nos den problema. Aki nos por mira tambe con e manera di pensa a cambia pa loke ta contaminacion di aire. Loke ta sosodiendo awendia na Barcadera muy probablemente no ta mas grave cu e situacion na San Nicolas tabata pa decada, ora biento bira. Esunnan di mas edad lo mester por corda cu na cierto ocasion e habitantenan por a pasa den e experiencia di mira sneeuw preto den San Nicolas.

Tur e añanan ey nos no tabata preocupa, pasobra ta cu esey hopi di nos tabata gana nan pan, y keha den e contexto aki lo no a yuda tampoco. Den e ultimo añanan, sin embargo, e habitantenan por a experimenta kico ta significa biba cu aire fresco, y si acaso e refineria lo a habri atrobe, lo tabata un pregunta importante si e habitantenan lo a haya gana placa asina importante, cu manera antaño nan lo tin gana di biba atrobe den holo di petroleo.

A proposito, te awe ainda gobierno no por/kier produci estadistica di con e refineria a afecta salud di e poblacion. Tur hende cu conoce San Nicolas sa cu biba den cercania di e refineria tabata implica acepta un probabilidad hopi mas halto di enfermedad di pulmon, y posiblemente cancer, pero manera bisa caba, e cifranan ta pertenece na e secretonan miho warda di Aruba.

En todo caso, tempo a cambia y e trahadonan na Barcadera no ta acepta e situacion y nan no tin pakico di haci esey tampoco. Definitivamente nos no por evalua y husga situacion awendia cu e criterionan di ayera, mucho menos di cincuenta aña pasa.

Anto, si e conclusion ta cu ta dilanti so nos por move, nos mester bay pone nos dilanti tur e elementonan importante cu ta forma parti di un vision pa futuro. Y den evalua diferente aspecto nos ta topa seguramente cu e necesidad di haci escogencia, tin biaha escogencia no asina facil. Por ehemplo, den e caso di e produccion di energia electrico, no ta cuestion solamente di bay uza heavy fuel oil di miho calidad. No, nos mester pensa di biaha kico mester bin na su luga, cu ta beneficia nos den diferente sentido. Gas natural ta parce e siguiente opcion, un producto cu ta kima hopi mas limpi cu fuel oil, pero ta keda un combustibel fosil. Pero nos por ta cumpliendo hopi miho caba cu nos obligacion como pueblo pa no contamina aire en general, y de paso cuidando salud di nos hendenan. Esaki ta duna nos un tiki mas tempo pa sigui traha riba e meta pa bandona e uzo di combustibel fosil mas tanto posibel, aunke mester mantene e realismo cu como isla riba su mes, nos mes mester percura pa nos sistema di backup, loke ta haci uzo di combustibel fosil casi inevitabel, pero en todo caso cu uzo di gas pa esaki.

Loke di tur manera mester evita, ta cu ta bin tardansa den saca fuel oil completamente for di e proceso, pasobra ta considera e ganashi, pues dividendo di e compania estatal cu ta importa y bende e fuel oil cu WEB. Nos sa cu gobierno ta den necesidad financiero grandi, pero por gana placa cu importa gas tambe. Y no bin bisa nos cu ta warda te dia nos tin nos mes gas, pasobra esey por tarda como 7 of mas aña, si acaso…

Otro aspecto di e mix nobo di e generacion di energia cu nos mester pa futuro ta loke e poblacion mes por haci. Nos a tuma nota cu un di e proyectonan grandi di energia limpi, e proyecto di molino na Urirama, no ta continua. Pa motibo di e luga, y pa motibo di e problemanan di ekilibrio ainda sin solucion den e red di distribucion, nos por ta di acuerdo cu esey, pero inevitabelmente ta surgi e siguiente pregunta: kico si nos ta bay haci?

Si nos observa otro paisnan cu ta trahando riba nan futuro energetico, nos por ripara cu nan ta pone hopi mas enfasis riba e produccion individual, cu e ciudadano mes por logra, a traves di energia solar, y den menor grado energia di biento. Por ta cu aki nos ta sinti e preferencia pa tene cos den man di e actor nacional, cu pa hopi decada tabatin e monopolio den generacion di electricidad. Por ta cu ta considera mas facil pa maneha un o un man yen di productor, cu  atende asunto cu miles di consumidor/productor? Aunke nos no ta kere cu aki tin ‘rocket science’ pasobra ata tur e otro paisnan ta logra?

Importante ta pa nos no dal para, despues cu e problema entre WEB y Barcadera keda resolvi, cu aire un tiki menos sushi, pero sigui investiga, evalua, involucra, y informa e comunidad den ki rumbo nos tin pensa di bay.