Mediante un conferencia di prensa ayera mainta, minister di Husticia Rocco Tjon hunto cu minister di Energia Glenbert Croes y Sr. Albertico “Tico” Koolman manager di N.V. Elmar a anuncia un proyecto importante pa asina por garantisa siguridad durante e paradanan di carnaval di e aña aki.
Minister Tjon a señala cu esaki ta prome biaha cu Ministerio di Husticia ta implementa un proyecto di e indole aki y tambe ta prome biaha cu nan ta haci’e den cooperacion cu N.V. Elmar pa e proyecto aki di instalacion di camaranan por ta exitoso.
Tambe, el a sigura cu diferente di e proyectonan aki lo por ta imposibel pa por ehecuta nan for di un Ministerio so y pa e motibo aki minister Tjon a duna su gradicimento na minister Glenbert Croes pa su colaboracion y contribucion duna den esaki.
El a splica cu esaki ta trata di un proyecto piloto cu nan ta bay ehecuta aworaki cu N.V. Elmar unda nan ta trahando caba riba e siguiente fase pa e proyecto di camara den su totalidad na unda esaki ta pa garantisa siguridad particularmente den trafico.
Manera ta conoci, e prome fase a wordo ehecuta caba hunto cu Setar N.V. den e area di hotelnan unda diamars ultimo nan a aproba e ministeriële beschikking (MB) pa nan por ehecuta e fase dos y tres di esaki. E fase dos ta bay ta den e ‘hotzone’ di e area hotelero cu ta bay cuminsa den luna aki y nan a aproba tambe e instalacion di camara den e cayanan di San Nicolas y den e cayanan cu ta conecta cu e caya principal, e instalacion di e camaranan aki ta bay cuminsa otro luna segun minister Tjon a expresa.
Den e MB cu a wordo firma, a informa cu den e area di San Nicolas un total di 24 camara lo ser instala y instalacion lo inicia e siman aki. Banda di esaki, na e ‘hotzone’ lo tin un total di 28 camara.
Despues cu nan lo wordo evalua e proyecto piloto aki nan lo sigui pa e fase cuater tambe conhuntamente cu N.V. Elmar pa loke ta trata e careteranan publico na Aruba.
Di su parti, Sr Koolman di N.V. Elmar a sigura cu nan ta contento di por forma parti di e proyecto aki na unda el a conta cu un par di aña pasa nan a cuminsa pone tur e luznan LED. Aworaki cu nan ta bezig cu e parti dos, unda nan a mira cu nan por agrega otro cos cu ta e sensornan, haciendo uso di e mesun infrastructura sin cu tin modo di pone cosnan extra colocando e camaranan riba e luznan pa contribui na e parti di siguridad no solamente pa comunidad di Aruba, sino tambe pa turistanan, igualmente ora tin eventonan y trafico lo cual ta lago cu nan ta haya como hopi importante.
“Nos ta sigur, cla caba pa e parti dos unda imagina bo cuanto luz y cuanto camara Elmar por pone y asina contribui na e parti di siguridad di Aruba,” el a bisa.
Minister Glenbert Croes a expresa cu den temporada di carnaval nan kier pa comunidad gosa pero cu siguridad, sin cu cosnan por bay for di man y si den dado momento esey lo pasa, aworaki Cuerpo Policial tin e hermentnan pa por actua hopi mas lihe. “Obviamente mi ta akinan pa resalta cu como comunidad nos ta aprecia e vision di nos colega minister di Husticia y un danki tambe na Elmar y tur e compania di Utilities cu ta empresanan cu tin coor business, pero obviamente nos companianan di gobierno ta bayendo den extra mile pa duna nan aporte na nos comunidad.”
Minister Tjon tambe a trece pa dilanti cu e proyecto aki ta uno temporario e cual ta solamente pa e ruta di carnaval pa eleva siguridad den e actividadnan aki: “e ley ta brinda nos espacio pa durante cierto periodonan y na cierto localidadnan specifico, ora tin eventonan manera carnaval por ehemplo, bo por haci uso di esaki. E ta bay keda aworaki pero mi tambe kier agrega cu e fase cu ya caba nos a aproba na San Nicolas un gran parti di e camaranan ta bay keda y na mesun momento un otro fase cu nos ta trahando riba dje ta cu Setar ta buscando informacion necesario pa full area di Playa tambe, esaki ta uno cu nos ta bay ehecuta hunto cu colega di otro ministerionan,” el a sigura.
Despues cu temporada di carnaval lo pasa, tocante e sistema cu mester wordo retira di e luga y pa e inversion cu a wordo haci no bay perdi, minister Tjon a comenta cu nan ta bay sigui cu e proyecto aki cu ta bay acapara full Aruba cu su careteranan publico y esaki ta e camaranan cu ta bay wordo usa.
Di esaki, Sr. Tico Koolman a señala cu riba e palo di luz tin un elemento cu facilmente ta yuda pa e camara conecta y desconecta. Aworaki cu nan lo coloca den e rutanan di e paradanan siguientemente nan por kita nan y pone bek na otro caminda.
“E ta un sistema hopi practico y hopi simpel cu nos por yega y haci uso di infrastructura cu Elmar tin caba,” el a splica.
