Diahuebs mainta minister di Turismo y Salud Publico Dangui Oduber a tene un conferencia di prensa na Baby Beach unda e mandatario a informa comunidad di e desaroyonan cu tin pa cu fase 2 di e proyecto di Baby Beach, specialmente e area di parkeer nobo.
Den un invitacion pa prensa por haya un recorido di tur e trabounan cu ta bin haciendo pa asina haya sa ki dia e proyecto aki ta wordo entrega y kico ta spera den e futuro, e mandatario a indica cu e proyecto ta forma parti di e MasterPlan cu tin pa e area di Seroe Colorado e cual a wordo anuncia algun tempo pasa hunto cu e proyecto di Rodgers Beach.
Minister Oduber a mustra riba e hecho cu turistanan ta paga hopi placa pa bin Aruba y p’esey ta importante pa keda haci inversion den e producto Aruba. E proyecto di Baby Beach Fase 2 ta acapara un area di 6000 m2 pa crea un espacio nobo di parkeer mas structura y mas organisa, tambe ta bay construi un rotonde den e crusada pa bay Baby Beach of Rodgers Beach, ademas di iluminacion pa e banda di e caya y e beach y tambe lo percura pa tin un landscape mas bunita.
E mandatario a duna di conoce cu si tur cos sigui segun plan e fase 2 di e proyecto lo wordo entrega pa e contratista CVC den luna di april, despues di esaki lo continua cu fase 3 di e proyecto cu e construccion di dos kiosko restaurant cu ta bay refleha e cultura Arubiano bendiendo cuminda tipico di Caribe, tambe ta bay drecha e canchanan di tennis y converti nan den un espacio multifuncional cu por wordo usa pa beach tennis, beach volley y beach soccer, ta bay tin bañonan publico pa tur bishitante y ademas minister Oduber a declara cu pronto lo bin cu un destaho publico pa cuminsa ehecuta e fase 3 y pa fin di e aña aki e proyecto di Baby Beach lo mester keda cla completo.
Na momento cu esaki termina lo bay cuminsa mesora cu e proyecto di Rodgers Beach caminda mescos cu e proyecto di Baby Beach tambe lo bay construi area di parkeer, pone iluminacion, bin cu kioskonan, etc.
Minister Oduber a señala cu e proyecto di Rodgers Beach ta bay cuminsa e aña aki y lo bay wordo financia cu fondonan di Tourism Product Enhancement Fund (TPEF) di cual ya caba tin un miyon florin aloca.
Igualmente minister a sigura cu tur e proyectonan aki ta bay percura pa eleva henter e area rond di e playanan aki teniendo na cuenta e importancia di conserva naturalesa, creando asina un desaroyo di embeyecemento di e area na un manera sostenibel.
“Turismo ta e driver di nos economia di Aruba y p’esey su desaroyo ta keda un prioridad. Pronto San Nicolas tambe ta bay haya su ‘fair share’ den e desaroyo di nos pais ora e bunita proyecto aki finalisa”, el a bisa.
Proyecto di renobacion di ex edificio di DOW
Den e conferencia di prensa aki tambe a wordo anuncia e proyecto di renobacion di edificio di DOW cu ya pa 15 aña ta bandona y ta un bista menos agradabel pa e bishitantenan crucero.
Segun a informa, ya caba pa algun tempo Gobierno a cuminsa haci su debido diligencianan pa asina explora e posibilidadnan pa Aruba Ports Authority (APA) tuma e edificio aki over, teniendo na cuenta cu pronto lo cuminsa e desaroyonan di Port City, a base di cual APA lo tin pa muda for di su edificio actual.
Minister Oduber a splica cu e idea ta pa APA tuma e edificio di DOW over, renoba esaki completo. Como esaki ta un edificio basta grandi ta bay comparti e edificio di manera cu e piso 2 ta bira oficinanan di APA, di su parti, Aruba Tourism Authority (ATA) ta bay bay huur piso 1 di e edificio aki y lo bay converti e piso aki den un Visitor Information Center (VIC) pa brinda informacion na e bishitantenan.
E VIC lo ta bon ubica di manera cu turistanan crucero por yega facil na dje unda minister Oduber a menciona cu esaki lo bay bira uno centro super moderno y luhoso cu lo brinda tur informacion di kico tur tin di haci na Aruba, kico ta tur e actividadnan, e miho beachnan, lista di restaurant y kico nan ta ofrece, nightlife, transporte y mucho mas, e lo sirbi como un guia pa e turista asina cu e baha di e barco crucero.
Minister Oduber a presenta su plan na Conseho di Minister di cual esaki a keda aproba y pronto e motibonan en conexion cu e traspaso di e edificio di DOW pa APA lo wordo publica den corant y riba website di Gobierno cu detayenan.
Despues cu esaki keda publica lo observa un periodo di 20 dia y lo por bay over e ora na haci un ceremonia oficial caminda lo bay firma un MOU entre Ministerio di Turismo, Gobierno di Aruba, APA, ATA, Stichting Monumentenfonds Aruba y Monumenten Bureau.
Finalmente Minister Dangui Oduber ta spera cu tur esaki por wordo concretisa e aña aki ainda pa asina e renobacion por cuminsa pa APA por tin un kantoor nobo y Aruba por tin su centro di informacion pa turistanan super moderno cu tur por ta orguyoso di dje.
