Ayera atardi na Renaissance Convention Center a tuma luga Stakeholders Meeting organisa pa Stichting Rancho, Stinchting Monumentenfonds Aruba, ATA, entre otro instancia, na unda a haci un invitacion na diferente organisacion y comerciantenan di Aruba pa informa riba e plannan cu tin pa e celebracion di 200 aña di Oranjestad.

Anne Witsenburg, director di Stichting Monumentenfonds, a conta cu nan a uni na e iniciativa aki di Stichting Rancho unda e plannan ta encera dos evento grandi y un evento protocolar. Ademas nan ta ofrece un plataforma pa cada un di esnan cu kier tuma e iniciativa pa uni na nan y comparti ideanan pa loke ta trata e celebracion aki cu ta bay dura un aña largo pa asina por duna un oportunidad na esnan cu kier participa.

Ta bay tin un evento pa dia 24 di augustus di e aña aki, cual ta un fecha significativo unda probablemente Oranjestad a haya su nomber 200 aña pasa, segun Witsenburg a bisa. E dia ey nan tin e idea pa organisa un actividad ceremonial, durante cual tin pensa di planta 200 mata. Ademas nan kier elabora un moneda conmemorativo pa celebra 200 aña di Oranjestad. Esaki ta proyectonan cu a presenta caba na Conseho di Minister.

Pa loke ta trata e moneda conmemorativo, esey tambe a tuma luga ora Oranjestad a cumpli 110 aña. Pa nan ta importante pa tuma esaki na cuenta e biaha aki, pero ta algo cu ta tuma su tempo y mester tin su proceso, manera e diseño y e decreto ministerial.

Igualmente e informa cu pa e aña aki nan ta bay organisa un feria grandi den districto Oranjestad, specificamente na Caya Grandi, cual ta bay ta un feria cu 200 tent di diferente mercado y negoshinan tambe por participa den e feria aki, manera nan a sigura. E dia ey lo tin 4 stage den full e area pa asina tin henter un fluho den e districto.

Durante aña tambe ta bay tuma luga otro eventonan cu diferente organisacionnan ta haci caba y ta bay cay tambe den e tema di celebracion di 200 aña di Oranjestad. Pa 24 di augustus, pero di aña 2025, nan ta bay cera e lista di actividadnan cu un concierto grandi gratis riba lama den Schoenerhaven, unda lo tin un show cu drone pa asina mantene e linea di sostenibilidad hunto cu e historia di Oranjestad, pa henter Aruba por disfruta di dje. “Esaki ta unico luga na Oranjestad unda bo por haya hopi hende riba boto, riba e cant’i lama y e ta e luga unda eigenlijk Oranjestad a origina,” Witsenburg a sigura.

Pa esaki, el a bisa cu na Hulanda a tuma luga un concierto manera esaki cu nan kier realisa y nan ta hayando reaccion di instancianan di Hulanda mes pa por haciele na Aruba tambe. “Nos tin mas cu un aña pa prepara pa cu esaki, pasobra esaki ta bay ta e evento cu ta e clausura di full e aña di celebracionnan di Oranjestad. E idea ta pa nos pone un stage riba awa, unda hende por drenta cu boto y hende tambe por sinta full rond di e area unda lo tin varios screen grandi pa por sigui cu e programa. Nos target group ta Aruba henter y ta algo pa nos celebra, organisa y celebra hunto tambe,” Witsenburg a comenta.

Anteriormente, nan a yega di reuni cu un grupo chikito mirando cu tin hopi iniciativa y nan ta pensando con por hinca tur esey den otro y con nan por yuda, pa motibo cu ta un celebracion pa Aruba henter y solamente cu un bon cooperacion di un y tur nan por logra haya un fiesta grandi.

Na mei 2023, Stichting Rancho a tene un conferencia di prensa riba e topico aki y tambe a haci un simposio pa trece dilanti e puntonan di atencion cu mester trata den area aki. Mirando cu ta bay cumpli 200 aña, mester ta adecua pa e eventonan den planning, como por ehemplo, maneho di desperdicio.

Den e simposio a documenta informacion y tambe a haci diferente workshop. Den esaki, Rosa a bisa cu tin e parti historico, pero e ora ey ta haci trabaonan pa evalua tambe kico lo ta e futuro di e fundacion den e contexto di 200 aña di Oranjestad, na unda nan a scoge cinco tema como di seguridad alimentario, desaroyo sostenibel, maneho di desperdicio, Turismo y Eco System, mantencion di herencia.

Ademas, nan a reuni cu Aruba Tourism Authority (ATA) ken ta un partner masha grandi den e proceso aki y tambe cu e inversionistanan cu ta activo na Wilhelminastraat.

Tin un plataforma riba rednan social tocante 200 aña di Oranjestad unda nan lo publica e actividadnan, den esaki Witsenburg a informa cu cada un di e plannan mester ta desaroya cu nan planning, su presupuesto, su historianan di Oanjestad tambe y despues cada actividad ta bay haya su grupo di trabou pa asina realisa tur e plan cu nan tin pensa pa haci y busca pa fondonan.

Witsenburg a señala cu nan mester di cooperacion pa motibo cu nan so no por logra tur loke kier realisa, pa e motibo ey si algun hende tin un idea of iniciativa cu por coopera cu e actividad di e celebracion di 200 aña di Oranjestad por tuma contacto cu nan riba e plataformanan di rednan social “200 aña di Oranjestad”.