Ta imposible ignora e hecho cu nos ta atendiendo un asunto sumamente grave cu e ataquenan, aparentemente bon prepara y ehecuta, riba e sistema di glassfiber di Setar NV. Na e promer asalto ainda por a pensa cu tabata trata di vandalismo, pero awor cu e hecho a ripiti, causando bastante daño na comunicacion na e isla, mester cuminza pensa riba algo mas serio; un ataque bon planea pa interumpi comunicacion y cu esey, bida economico mes. Mescos cualkier pais cu ta intimamente conecta cu mundo, nos economia ta exigi acceso na comunicacion internacional digital na cada momento.

Nos lo no bay specula ken ta tras di e asaltonan aki, cu ta atentado contra comunidad mes tambe, ya cu e ta afecta gran parti di nos, di cual hopi durante dia y nochi ayera no tabatin acceso na telefon mobil. Nos ta apenas den e proceso aki y ta logico cu autoridadnan no por divulga tanto na e altura aki.

Sin embargo, e incidentenan aki ta mustra nos un biaha mas con vulnerable nos ta, con relativamente facil e ta pa stroba bida economico pa sigui su rumbo. Y esaki si ta algo pa nos reflexiona, pasobra di e tipo di factor insigur aki tin varios mas. Algun di e grandinan nos ta experimenta cada aña por lo menos un par di vez, cu ta e interupcion di suministro di electricidad y den menor sentido, suministro di awa. Aunke aki no mester subestima e peligro, pasobra na e momento aki produccion di awa pa bon parti ta via ‘reverse osmosis’ cu ta opera a base di disponibilidad di coriente. No ta pornada cu algun tempo pasa, cu e sindicatonan no a haya nan gana cu e eliminacion di e medida di 12,6%, cu e rumornan di ‘pone Aruba plat’ no a cay na agrado di gran parti di e poblacion. Esun cu ta desea di subi e caminda ey lo por ta sigur di no conta cu tanto simpatia den pueblo. Y francamente dicho, nos no ta kere cu tin interes sindical cu por yega na surpasa e nivel di interes general. Ademas, nos ta kere cu cualkier huelga cu di berdad lo kier pone Aruba plat, lo no topa cu tanto benevolencia di nos magistradonan. Pero enfin, ban spera cu semper por regla e asuntonan bon, sin cu mester recuri na e medidanan extremo aki.

Pa bolbe na e asunto di Setar; e incidente aki ta mustra riba e vulnerabilidad di nos sistema di comunicacion digital internacional, cu te awe, asina leu cu nos ta na altura, ta depende di un solo cable cu ta conecta nos cu mundo. E cable ey ta den poder di Setar y no ta tuma un genio pa pensa cu pa nos propio seguridad ta importante pa conta cu cierto ‘redundancy’: mas di un posibilidad pa conecta cu mundo, pa por garantiza cu nos por haci loke nos mester den comunicacion cu otro pais y continente, na cualkier momento di dia y nochi. Anto, kico ta mas logico cu duna otro operador tambe acceso na e mercado, cu nan propio cable internacional, loke no ta beneficia e empresa particular ey so, sino Aruba en general?

Dicon esaki? Djis pensa un rato riba e posibilidadnan di atrae negoshi di operacion di por ehemplo data warehousing aki. O di call center unda nos por haci uso di nos posicion sigur pa loke ta situacion politico y social, y bon conexion internacional y un poblacion cu por maneha varios idioma. Y no bin bisa cu esey ta algo pa paisnan pober, pasobra no ta pornada nos ta mira tanto di e negoshinan aki ta establece por ehemplo na Hulanda. Pero… esaki ta exigi e ya menciona ‘redundancy’ pa garantiza cu practicamente nunca nos teritorio ta inalcanzable for di exterior, o vice versa. Y aki e storia ta tuma un rumbo un poco mahos.

Den ultimo dos decada tabatin varios intento pa yega na establece servicio alternativo di acceso na exterior a traves di cable, pero tur intento a keda frustra pa gobiernonan di diferente color politico cu ta defende e monopolio di Setar sin mas. Tabatin un empresa local cu a perde por lo menos cienmiles di dollar si no ta mas den un bataya di mas di 10 aña, unda gobierno a usa tur e trikinan imaginable di e procesonan di apelacion di LAR, pa manda e asunto den un bataya a largo plazo, pa cual gobierno si tabatin e cartera grandi (di nos, a proposito) pa derota e empresa, pero no den corte. Tin otro candidato awor, cu ta e competidor riba tereno di telefonia mobil, di cual nos no sa sigur si nan ta logrando nan proposito, cu of sin intervencion di juez. Gobierno sa masha bon cu defende e monopolio di e empresa estatal lo no tin bida eterno, pero por lo pronto nos no ta bay tin multiple acceso na mundo digital, sin su posible beneficio. Ta pesey ta casi ridiculo ora ta papia di posible alternativa pa diversifica economia, y ta menciona solamente e ‘cuentos de hadas’ di nan agrado, y no loke ta realmente factible. Ta di spera cu e incidente aki, fuera di e condena fuerte di e delito riba su mes, por pone nos reflexiona riba con pa limita o hasta elimina e riesgonan grandi aki. Nos a haya basta contratiempo caba ultimamente.