Minister di Finanzas a presenta e Nota di Fin di Aña 2024 na Parlamento di Aruba den cual ta informa e Parlamentarionan riba e cambionan cu ta prepara den e segundo Presupuesto Complementario 2024 cu pronto lo keda presenta na Parlamento pa su aprobacion. Den e Nota por mira tambe e cambionan cu ta necesario pa aloca e fondonan pa proyectonan den cuadro di implementacion di e Landspakket.
Pa locual ta e cartera di Finanzas, Minister Xiomara Maduro ta informa cu ta aloca fondo pa realisa proyectonan den cuadro di Thema A Landspakket cu ta trata e mehoracion di e maneho financiero di Aruba. Den esaki tin e E-LOFA cu ta e curso digital di Leergang Openbare Financiën cu lo yuda na capacita y engrandece e conocemento di finanzas publico di e trahadornan financiero di Gobierno di Aruba. Banda di esaki tin e proyecto di ‘3 Lines of Defense’ cu ta un proyecto grandi den cual e procesonan y administracion financiero di Gobierno ta wordo optimalisa. Tambe tin e proyecto di ‘verslaggevingsstelsel’ cu ta un otro proyecto grandi cu mester hiba na certificacion door di un accountant externo di e Cuenta Anual di Pais Aruba di aña 2026.
Den un comunicado di prensa minister ta enfatisa cu e proyectonan aki ta hopi importante pa e mehoracion di finanzas publico di Aruba. E proyectonan di ‘3 Lines of Defense’ y ‘Verslaggevingsstelsel’ ta proyectonan grandi cu ta tuma tempo, ta costa placa y ta exigi basta capacidad pa asina por keda ehecuta. Den pasado, por ehempel, na Hulanda mes a dura mas di 20 aña pa caba di implementa e mehoracion nan necesario den e proyecto ‘Operatie Comptabel Bestel’ pa yega na jaarrekening certifica door di accountants externo.
