(CNN) – Ex-presidentenan di Honduras, Porfirio Lobo y Juan Orlando Hernandez a ser acusa diaranson ultimo pa tribunalnan di husticia pa supuesto desvio di mas di 2.5 miyon dollar, segun Unidad Fiscal Specialisa Contra Rednan di Corupcion (Uferco) dependencia di Ministerio Publico, a indica den un comunicado.
E rekerimento presenta pa Secretaria di Corte Supremo di Husticia ta acusa Lobo Sosa pa delito di fraude y Hernandez Alvarado ta acusa di delitonan di fraude y labamento di activos.
Den e comunicado, Uferco ta acusa e ex-presidentenan, hunto cu otro ex-funcionarionan, di participa den un red di corupcion den periodo di 2010-2013, den cual a duna 12 miyon dollar na fundacionnan pa financia e campaña presidencial di Hernandez, ken tabata presidente di Congreso e tempo ey.
Den e comunicado, Uferco a solicita e citacion di algun di e ocho persona acusa y orden di captura y alerta migratorio pa otronan.
Den declaracion pa medionan local, Lobo Sosa a sigura cu e acusacion aki ta forma parti di un persecucion politico den su contra y cu nunca el a keda cu un cen di fondonan di Estado tempo cu e tabata presidente di Honduras den e periodo di 2010-2014.
Di su parti, abogadonan di Hernandez Alvarado, ken ta preso na Merca despues di su extraditacion na april di 2022 pa responde pa delitonan relaciona cu trafico di arma y narcotrafico, no a reacciona na e noticia aki.
