(AP) – T-Mobile a keda di acuerdo pa paga 350 miyon dollar na clientenan afecta den un demanda conhunto cu a ser poni den contra di e compania despues cu nan a revela den augustus di aña pasa cu datonan personal a ser horta den un atake cibernetico.
Den un documento entrega na Securities and Exchange Commission diabierna, e compania di telefon a bisa cu e fondonan lo paga pa e compensacion di e miembronan den e demanda, e costonan legal di e acusadonan y e costonan relaciona cu e administracion di e acuerdo. Tambe nan a bisa cu nan lo inverti 150 miyon dollar otro aña y den aña 2023 lo fortifica su siguridad di dato y otro tecnologia.
T-Mobile a bisa cu e acuerdo aki no ta contene ningun admision di culpabilidad ni responsabilidad di ningun di e acusadonan. E compania a bisa cu nan ta premira aprobacion di corte pa cu e terminonan di e acuerdo den december di e aña aki.
Casi 80 miyon residente Mericano a ser afecta pa e crimen aki. Ademas di nan number di seguro social, otro informacionnan tambe a ser mira incluyendo nombernan y informacion di rijbewijs of otro forma di identificacion.
T-mobile, basa na Bellevue, Washington a bira un di e pais su servicionan di telefon mas grandi conhuntamente cu Verizon y AT&T, despues di a adkiri e rival Sprint den aña 2020. Nan a reporta di tin un cantidad di 102.1 miyon cliente na Merca despues di e adkisicion.
