“Aunke mi ta orguyoso di mi nacionalidad Hulandes, mi ta sinti mi mes mesun of mas na cas na Aruba cu na Hulanda. Ora mi ta na otro pais y hende puntra mi di unda mi ta mi ta contesta cu mi ta di Aruba.”
Karin Swiers kende tin 15 aña riba nos isla ta sinti su mes completamente na cas na Aruba. Sra. Swiers ta conta con pa prome biaha den 1989 por medio di contacto cu un Arubano na Hulanda el a bin Aruba. Originalmente di Hulanda, sra. Swiers a pasa su prome 6 simannan riba vakantie na Aruba hunto cu un famia Rubiano, cual segun e a dun’e un chens pa ser conoci cu cultura Arubano desde paden.
“E tempo ey ora mi tabatin 17 aña ya caba mi a haya Papiamento interesante pasobra constantemente mi tabata tende ora mi tabata sali cu mi amigo y su famia. Nos tabata bay riba trip na Club Visage, entre otro. Desde e momento cu mi a yega aki mi tabata sinti na cas.”
Algo cu sra. Swiers semper a experiencia ta e hospitalidad y sintimento caluroso cu e Rubianonan tabata rondon’e cu ne. Ora el a dicidi di bin bek Aruba den 2004, el a haya un sintimento asina fuerte pa Aruba cu e no tabata kier bay Hulanda bek. “Mi tabata sinti manera tur mi bida mi tabata pertenece aki.”
“Durante añanan cu mi tin aki tin hende Rubiano cu ta bisa mi cu nan ta haya cu mi ta mas Rubiano cu nan! Imagina bo.” Esaki podise ta por medio di sra. Swiers su mesun interes pa sigui siña di Aruba ora e ta bay riba tournan den Parke Arikok por ehempel, asina e sa haya sa hopi cos mes di nos isla.
‘Yiu sin dolor’
E famia Arubano cu a adopta sra. Swiers di manera figurativo desde 1989 a integr’e completamente den nan famia. “Nan ta bisa mi cu mi ta nan yiu sin dolor. Maske mi no ta un conexion di sanger nan ta mi famia y ami ta nan famia.”
Pero su conexion cu Aruba ta bay mas atras cu esey, aunke e no sa con pa splica esaki. Sra. Swiers ta conta con pa hopi tempo e tabata bay riba biahe y bishita hopi diferente pais. Pero semper el a bay bek su pais. Maske manera e ta splica cu e ta haya hopi pais bunita, incluyendo hopi otro islanan den Caribe, esaki no ta compara cu Aruba.
“Esaki a cambia completamente ora mi a bin Aruba. Ningun otro pais a pone mi sinti na cas manera Aruba.” Na tur otro caminda cu e tabata bay sra. Swiers tabata eventualmente haya falta di su hogar na Hulanda, pero el a experiencia lo opuesto na Aruba. “Mi tabatin e sintimento cu mi tabata pertenece aki, y e tabata un sintimento cu mi no por a racionalisa.”
Conexion inexplicabel
Sra. Swiers no por splica dicon e tin un conexion asina fuerte cu e pais y e hendenan di Aruba. E parti aki sra. Swiers ta relaciona posiblemente cu un charla cu su mama a sigui na Universiteit van Maastricht. Aki tabata papia di conexionnan psicologico cu por forma entre un baby cu no a nace ainda y loke e ta experiencia den matriz di su mama. “Por ehempel ora un mama ta ataca pa un cacho, hopi biaha e yiu ta haya miedo pa cacho ora e crece.”
Su mama a bay papia cu e docente cu a duna e charla pa haya sa dicon su yiu despues di bay Aruba den su wowo a cambia completamente ‘manera si ma bira Rubiano diripiente’.
Despues di papia, a bin na luz cu sra. Swiers su mama y tata tabatin plannan hopi concreto pa bin Aruba, y e tabata asina leu cu su tata a haya trabou aki caba. Pero despues di a haya sa cu nan lo haya un baby, nan a dicidi di keda na Hulanda. “Mi por a nace na Aruba, pero esaki no a bay asina.”
Sra. Swiers no ta haya personalmente cu e storia aki ta splica su relacion inexplicabel cu Aruba, pero e ta kere personalmente cu ‘hende tin mas bida cu nan a biba antes’. Y den un bida anterior, sra. Swiers ta kere cu el a biba na Aruba. “No tin otro manera pa splica con conecta mi ta cu Aruba.”
“Tin hopi cosnan di Hulanda cu mi no sa, ni mi ta particularmente interesa den nan y hopi luganan cu mi no a bay. Pero puntra mi algo loco di Aruba y mi sa di dje.”
