Encuanto e punto di discordia entre directiva di SVGA y trahadonan di e fundacion representa pa sindicato FTA, Director di Stichting voor Verstandelijk Gehandicapten Aruba (SVGA), sr. Arturo “Tuyo” Werleman Werleman a reconoce cu e gratificacion di hubileo ta parti di e convenio di e contracto colectivo (CAO).
Nan a yega di paga –segun sr. Werleman- e gratificacion aki dor di nan propio fondonan for di aña 2011 te cu algun di 2015. Pero esun di 2011 y 2012, gobierno no a paga bek e placa y e fundacion a entabla un caso contra gobierno, caminda e sentencia a cay a fabor di fundacion.
Pago di gratificacion
El a bisa cu gobierno a paga un suma e tempo ey, a base di sentencia pero despues di esey nan no a paga atrobe. Sr. Werleman a indica cu e placa a yega na un suma di 78.290 florin cu e fundacion a financia di su propio fondo. Pero e aña aki ta uno cu e fundacion a confronta su mes cu e situacion di un 15 hende cu a drenta na servicio pareu 25 aña pasa, y nan mester haya gratificacion di hubileo. E suma total cu nan mester paga ta yega na 64 mil florin.
El a bisa cu e fundacion a cobra gobierno pa paga esaki, pero gobierno no a page ainda a base di e convenio di subsidio cu nan tin cu gobierno, y tambe a base di sentencia di hues cu tin caba. Pa tal motibo directiva di e fundacion SVGA a bolbe lanta un caso contra gobierno cu ta andando aworaki.
Otro aspecto cu sr. Werleman a trece dilanti ta cu gobierno paulatinamente a baha e ultimo añanan e subsidio di e fundacion, y considerando cu e suma cu e fundacion mester paga di 64 mil florin pa gratificacion di hubileo na e 15 trahadonan, directiva di SVGA a pidi un spera pa cumpli cu e compromiso aki. Sr. Werleman a bisa cu nan a pidi un spera pa paga e gratificacion di hubileo, te ora cu e caso ta keda cla of te momento cu gobierno ta manda e placa pa e fundacion.
Reunion
Nan a tene un reunion cu FTA y representante di e trahadonan dia 2 di october ultimo, caminda e directiva di e fundacion a splica nan e situacion. “Nos a pone FTA na altura cu tin un caso dilanti hues. Nos a pone FTA na altura cu e personanan tin derecho riba e placa aki. Y si nos haya e placa nos por page”, el a bisa. Segun sr. Werleman, nan a trece diferente alternativa cu e sindicato por a adopta prome cu nan bay den accion, te hasta esun di entabla un caso contra e fundacion of contra gobierno. Pero locual directiva di SVGA a reitera ta pa no perhudica e cuido cu e fundacion aki ta brinda.
El a admiti cu actualmente e fundacion no tin e placa aki, ya cu nan likides poco poco ta bahando y gastonan ta birando mas grandi. Mientras cu e placa pa e clientenan cu ta exigi mas cuido y mas calidad, no ta subi.
Lesa tambe e director su comentario riba e accion. Y tambe e banda di FTA.
