Directora di Stichting Voor Verstandelijk Gehandicapten Aruba (SVGA), Els van Homelen, ta bisa cu pa tur fundacion cu ta traha cu hendenan special of cu limitacion, ta hopi importante pa gobierno ratifica tratado pa derechonan pa hendenan cu limitacion. Esaki ta un tratado cu Hulanda a wordo rectifica na 2016 cu ta reconoce e derechonan di hende cu limitacion.
“Nos realmente lo desea pa e siguiente gobierno cu ta bay bin ratifica esaki tambe.
Esey ta e prome paso hopi importante pa haci, ” sra. Van Homelen ta bisa Bon Dia.
Riba 1 di december lo tin un caminata cu e fundacion a organisa unda cu tur fundacion cu ta traha cu hendenan cu limitacion lo presenta. E dia ey tin planea pa entrega e tratado na tur parlamentarionan y ministernan nobo pa ta bon consciente cu esey ta un trabao cu nan lo mester bay cumpli cu ne. E tratado aki lo encera cu gobierno lo reconoce cu nos hendenan special y cu limitacion tin derecho tambe pa participa den comunidad. Pues cada decision cu wordo tuma lo mester tene cuenta cu esey. Gobierno a rectifica e tratado pa derecho di mucha caba, pero e tratado aki pa hendenan cu limitacion ta uno hopi importante tambe pa fundacionnan social y Aruba den general, segun sra. Van Homelen.
Claridad riba parti financiero
Pa SVGA tambe ta importante pa bin claridad riba e parti di financia. Aworaki no ta mucho cla kico e fundacion ta bay haya otro aña y kico ta bay bira e exigencianan.
“Esey ta haci e hopi dificil pa tuma decisionnan”, e directora ta expresa. Tin par di cos di antes cu ta pendiente ainda por ehempel: mester duna cierto trahadonan cesantia pero gobierno demisionario a laga sa cu nan no ta bay paga esaki. E ta un suma hopi halto segun e fundacion. Nan ta keda boga anto a manda hopi carta riba esaki. “Ta hopi importante pa un gobierno nobo tin oido pa cierto cosnan di pasado cu a bin dilanti pa wordo regla.” Tin hopi cartanan tambe na Departamento di Recurso Humano tocante di kindertoelage entre otro y algun otro cos pendiente. Aworaki nan ta den e fase cu gobierno ta bisa cu nan ta haya subsidio a base di prestacion. Pero nan a tuma e suma di 2016 cu tin hopi cos pendiente ainda na Departamento di Recurso Humano. Esey ta trece hopi problema cu nan tin cu sindicato y personal, segun e directora.
Mester mas placa pa cuido
E fundacion ta haya hopi importante pa e siguiente gobierno realisa cu mester bin mas placa pa cuido di nos hendenan. E populacion di Aruba a crece pues mester duna mas hende cuido cual lo costa mas. “Esey ta conta pa e pasadianan pero tambe pa casnan unda hendenan por bay biba.” Ultimo a sosode algun incidentenan cu hendenan psikiatrico por ehempel unda cu ta señala cu tin necesidad di esaki. “No ta solamente un Cas Sjabururi por ehempel cu mester mas trahado pero tambe mester mas cas pa e hendenan. E grupo aki mester extra atencion cu mi sa cu departamento di Asuntonan Social ta na altura di dje cu nan a bisa caba cu lo traha un comision pa traha riba esey. Mester sigui traha riba esey y tambe casnan regular,” sra. van Homelen ta splica.
Lista di spera
SVGA tin un lista di espera di mas o menos 100 hende y tin un grupo di hende cu antes tabata planifica pa bay un cas di cuido na San Nicolas, cu casnan adapta pa e hendenan cu mester un cuido hopi special. “Y ainda no tin nada eynan. Pues ta hopi importante pa reconoce cu mester mas cuido, mester mas placa pa esaki y pa pensa creativo na con pa yega na e placa.” Un ehempel ta pa bin cu un ‘zorg tax’ (impuesto pa cuido) segun e fundacion. No solamente pa nan grupo di hende, pero tambe pa hendenan di edad cu mester cuido. “Nos tur mester aporta, no solamente trahadonan di fundacionnan pero tambe tur ambtenaar por ehempel. Of haci e den producto mescos cu e health tax. Mester bin algo pa traha un fondo pa bin mas na cuido. Si bo ta un pais cu kier traha na beneficio di tur bo hendenan, bo mester haci esaki.”
