Dia 3 di december ta conoci mundialmente como e Dia Internacional di Personanan cu Discapacidad. En conexion cu e celebracion special aki Bon Dia Aruba a combersa cu Sr. Elvira Tromp, Cabesante di Centro Man na Obra di Stichting Verstandelijk Gehandicapten Aruba (SVGA) cu a splica tocante e trabao y meta di SVGA y tambe a topico di inclusion den comunidad di personanan cu discapacidad.
Centro Man na Obra ta habri desde aña 1985. Sra. Tromp ta splica cu e localidad a cuminsa tuma e tempo ey clientenan di 18 aña pa ariba y e meta semper tabata, y ta ainda, pa sigui desaroya e cualidadnan di e personanan cu discapacidad, pa haci nan mas independiente, pero principalmente pa siña nan habilidad di trabao. “Nos tin algun cliente cu nos ta sigur cu nan por yega na drenta e mercado laboral”, el a bisa.
Centro Man na Obra tin diferente grupo di labor den cual e cliente mes por scoge esun cu e lo kier bay siña. Grupo di trabao cu e cliente por scoge pa traha na e centro ta: grupo di strica paña, grupo cu ta traha bela, grupo di traha ceramica, grupo cu ta decora ceramica, grupo di hardin, grupo di carpinteria y grupo di laba auto. Den tur e grupo di trabao nan aki e accento ta keda poni p’e cliente haci e trabao di un calidad halto.
Inclusion di personanan cu discapacidad den comunidad y mercado laboral ta un tema cu ainda falta mehoracion y Sra. Tromp ta señala cu aunke tin un progreso cu a wordo haci compara cu varios aña atras, ainda falta. El a indica cu e portanan a cuminsa habri, pero ainda tin un buraco, y e portanan por habri mas. “Nos ta spera cu nan habri mas pasobra hopi di nos personanan tin potencial y e doñonan di trabao mester mira e potencial tambe”, el a comenta.
El a splica cu hopi biaha un trabao pa un persona cu no tin discapacidad ta un trabao rutinario, tur dia e ta mesun cos, pero hustamente pa e personanan tin algun discapacidad e ta bon. “E trabaonan ey ta faborabel pa nan pasobra nan si no ta cansa cu e trabao ta rutinario. Mi mes tin experiencia di algun cliente cu nos a pone na trabao y nan doño di trabao ta bisa mi, pero e hendenan ki ta cumplido, poco biaha nan ta malo, nan ta trempan na trabao y nan ta ultimo cu ta sali, dus nan ta hendenan hopi cumplido y unabes cu nan ta mara nan mes na algo nan ta cumpli cune tambe”, el a agrega.
E ultimo cuatro aña Man na Obra a cuminsa manda un grupo di cliente, cu guia di lidernan, pa bay haci trabaonan pafo di e centro. Mayoria di e clientenan nan aki ta clientenan cu no por haya un trabao independiente debi na edad of otro factor. Pa e clientenan cu tin un edad relativamente abao y tin un desaroyo positivo den nan habilidadnan di trabao, conducta, disciplina etc. Man na Obra ta busca stage pa nan pafo di e fundacion pa nan por haya otro experencia di trabao.
SVGA tin diferente departamento, e ta consisti di Scol Duna un Man cu ta un basisschool, unda cu e muchanan ta keda te cu 16 aña. E Departamento Bibito Pin ta un pasa dia pa mucha cu ta cuminsa y tuma muchanan di 2 aña y nan ta keda te cu 16 aña, y dependiendo di e desaroyo di e muchanan nan ta evalua unda e mucha lo bay despues, e por ta scol of un di e otro departamentonan. Briyo di Solo ta un pasa dia pa adulto cu ta di 16 aña bay ariba y hoben- y adultonan ta keda den e departamento te ora cu nan por participa cu e meta di e departamento. Mesun cos ta conta pa Centro Man na Obra, nan ta tuma e muchanan cu 16 aña y nan ta keda na e centro tanten cu nan por participa cu e meta cu e centro tin.
E celebracion e aña aki pa Dia Internacional di Personanan cu Discapacidad, pa motibo di e situacion cu e pandemia di COVID-19, Sr. Tromp ta splica tabata simpel, pero special toch pa nan clientenan. “Nos a tuma e invitacion di cinema pa bay y nos hendenan tambe gusta wak pelicula, nan tambe ta gusta sali, nan tambe ta gusta ta den comunidad y e celebracion a bay un poco mas simpel door di e situacion pero nan a disfruta y sigur nos a duna nan e atencion special awe, y no solamente awe pero tur dia tambe”, el a bisa.
Recientemente SVGA a ricibi invitacion pa asisti na e reunion di e proyecto piloto di intervencion trempan cu ta organisa pa Departamento di Mucha y Hoben (DMH) den colaboracion cu Social Crisis Plan (SCP) y Plataforma Intervencion Trempan Aruba (PITA). Sra. Tromp a comenta cu e proyecto ta algo cu sigur lo yuda pa loke ta trata inclusion di e hendenan special den diferente aspectonan cu nan tambe por wordo mira y cu por corda riba nan, sobre todo si e ta bin di gobierno y asina automaticamente e otro sectornan priva y comercial lo wordo motiva pa nan tambe duna nan aporte.
“Mi ta bisa duna e hendenan aki un man, unda cu nan mester di ayudo no cera porta pa nan. Nan ta forma parti di nos comunidad mescos cu tur otro, dus duna nan apoyo”, Sra. Tromp a finalisa.
